काठमाडौं । काठमाडौँ महानगरपालिकाले शैक्षिक सत्र २०८२/०८३ का लागि कक्षा ११ र १२ मा संस्थागत विद्यालयहरूको छात्रवृत्ति कोटामा अध्ययन गर्न इच्छुक विद्यार्थीहरूका लागि लिएको प्रवेश परीक्षाको नतिजा सार्वजनिक गरेको छ।
महानगरको शिक्षा विभागका अनुसार देशभरका ७७ जिल्लाबाट प्राप्त १७,२२९ आवेदनमध्ये प्रारम्भिक छनोटमा १६,१३७ विद्यार्थी परेका थिए। तीमध्ये १४,१७३ विद्यार्थीले शनिबार आयोजित प्रवेश परीक्षामा सहभागी भएका थिए।
५४ परीक्षा केन्द्रमा परीक्षा सञ्चालन
परीक्षा काठमाडौं महानगरभित्रका ५४ वटा परीक्षा केन्द्रहरूमा सञ्चालन गरिएको थियो। परीक्षा कक्षा १० को पाठ्यक्रममा आधारित रहेको थियो।
विषयगत प्रश्न र पास मापदण्ड
परीक्षामा:
गणित, विज्ञान, अङ्ग्रेजीबाट ३०–३० प्रश्न
सामान्य ज्ञानबाट १० प्रश्न
कुल १०० अङ्कका बहुविकल्पीय प्रश्न
गलत उत्तरका लागि नकारात्मक अङ्कन नराखिएको र उत्तीर्ण हुन कम्तीमा ४० प्रतिशत अंक आवश्यक रहेको शिक्षा विभागले जनाएको छ।
नतिजा हेर्ने तरिका
विद्यार्थीहरूले प्राप्त पासवर्ड र विवरणबाट अनलाइन लगइन गरी आफ्नो नतिजा हेर्न सक्ने व्यवस्था गरिएको छ।
महानगरले छात्रवृत्तिको प्रभावकारी कार्यान्वयनका लागि व्यवस्थित प्रविधि, पारदर्शी परीक्षा प्रणाली र निष्पक्ष मूल्याङ्कनमार्फत योग्य विद्यार्थीलाई अवसर दिन खोजिएको जनाएको छ।
