काठमाडौँ। काठमाडौँ महानगरपालिकाकी कार्यवाहक मेयर सुनिता डंगोलले वडाबाट केन्द्रमा आएका सबै फाइलहरूमा आगामी सोमबारभित्र निर्णय गरिसक्न विभागीय प्रमुखहरूलाई कडा निर्देशन दिएकी छन्।
महानगरपालिकाको सभा कक्षमा आयोजित पाक्षिक समीक्षा कार्यक्रममा उनले प्रक्रिया पुगेका फाइललाई स्वीकृत गर्न र नमिलेका फाइललाई स्पष्ट कारण खुलाएर फिर्ता पठाउन आग्रह गर्दै सेन्टरमा फाइल शून्य बनाउन निर्देशन दिएकी हुन्।
कार्यवाहक प्रमुख डंगोलले वडा सचिवहरूलाई सम्बोधन गर्दै बजेट खर्च गर्ने नाममा गुणस्तरहीन काम नगर्न समेत सचेत गराइन्। ‘बजेट सक्नकै लागि मात्र गुणस्तर नहुने योजनाहरू कार्यान्वयन नगर्नुहोस्,’ उनले भनिन्, ‘वडाको सेवामा महानगरपालिकाको मुहार देखिन्छ, त्यसैले जनसेवा र पूर्वाधार निर्माणमा विशेष संवेदनशीलता अपनाउनु आवश्यक छ।’
समीक्षा बैठकमा वित्त विभागका प्रमुख डा शिवराज अधिकारीले महानगरको हालसम्मको वित्तीय अवस्था प्रस्तुत गरे।
जसअनुसार महानगरपालिकाको कुल खर्च ४०.९४ प्रतिशत र वडाहरूको औसत खर्च ३९.३ प्रतिशत छ।
