काठमाडौँमा सहरी सुरक्षा र सडक व्यवस्थापनमा सहकार्य बलियो बनाइने

काठमाडौँ। सडक सुरक्षा, सहरी सुरक्षा र सहरी व्यवस्थापनका क्षेत्रमा काठमाडौँ महानगरपालिका र नेपाल प्रहरीबीचको सहकार्य थप सुदृढ बनाइने भएको छ।

महानगरपालिकाका कार्यवाहक मेयर सुनिता डंगोल र प्रहरी महानिरीक्षक दानबहादुर कार्कीबीच बिहीबार भएको भेटघाटमा वर्तमान अवस्था, चुनौती र आवश्यक सुधारका विषयमा विस्तृत छलफल भएको हो।

भेटका क्रममा कार्यवाहक मेयर डंगोलले सडक सुरक्षा, ट्राफिक व्यवस्थापन, अतिक्रमित सार्वजनिक जग्गाको संरक्षण तथा उपयोग, अव्यवस्थित बसोबास व्यवस्थापन र सहरलाई सडक मानवमुक्त बनाउने अभियानमा नेपाल प्रहरीसँग नजिकको सहकार्य आवश्यक रहेको बताइन्। उनले महानगर प्रहरी बललाई नेपाल प्रहरीको सहयोगबाट अझ प्रभावकारी बनाइने विश्वास व्यक्त गर्दै त्यसबाट नागरिकले प्रत्यक्ष परिवर्तन अनुभूति गर्ने उल्लेख गरिन्।

प्रहरी महानिरीक्षक कार्कीले महानगरपालिकालाई आवश्यक पर्ने सम्पूर्ण सहयोग उपलब्ध गराउन आफू तयार रहेको स्पष्ट पारे। उनका अनुसार उपत्यका प्रहरी कार्यालयमार्फत महानगरका काममा प्रभावकारी समन्वय गरिनेछ र त्यसका लागि फोकल पर्सनसमेत तोकिएको छ। साथै, सचेतनामूलक कार्यक्रम, नागरिक सहभागिता र सूचनाप्रविधिको प्रयोगमार्फत कम जनशक्तिमा बढी नतिजा दिने प्रणाली विकास गर्न महानगरसँग सहकार्य अपेक्षित रहेको उनले बताए।

छलफलका क्रममा लागूऔषध दुव्र्यसन नियन्त्रण, सार्वजनिक स्थलमा धुमपान तथा मद्यपान नियन्त्रण, पार्किङ व्यवस्थापन, सडक संकेत तथा ट्राफिक प्रणाली सुदृढीकरण, रात्रि तथा विहानी बस सेवाको सुरक्षा, तथा ‘सडक मानवमुक्त काठमाडौँ’ अभियानअन्तर्गत सञ्चालन हुने सेवामा नेपाल प्रहरीको सक्रिय सहभागिताजस्ता विषयमा समेत सहमति भएको छ।