काठमाडौं । अहिले सामाजिक सञ्जालमा एउटा भिडियो निकै भाइरल भइरहेको छ । सरकारी नम्बर प्लेट रहेको गाडी डिभाइडर नाघ्छ अनि ‘लेन क्रस गरेर हुइँकिन्छ । सडकको जाम छल्न डिभाइडर नाघेर लेन क्रस गर्ने गाडी पुल्चोकस्थित जल उत्पन्न प्रकोप नियन्त्रण विभागको हो ।
बा १ झ ७६७५ नम्बरको गाडीले शनिबार चक्रपथ अन्तर्गत ललितपुरको सातदोबाटोमा डिभाइडर नाघेर लेन क्रस गरेको थियो ।
उपत्यका ट्राफिक प्रहरी कार्यालयले यो गाडीका चालकलाई कारबाही गरेको छ ।
ट्राफिक प्रहरी कार्यालयले प्रेस नोटमा भनेको छ,‘सामाजिक सञ्जालमा सरकारी गाडीले सवारी नियम उलंघन गरी सवारी चलाएको विषयमा विभिन्न प्रतिक्रिया र गुनासो गरेको पाइएकोमा उक्त सवारी साधन र चालकलाई यस काठमाडौं उपत्यका ट्राफिक प्रहरी कार्यालय रामशाहपथबाट खोजतलास र अनुसन्धान गरी उक्त सवारी साधनलाई फेला पारी सो सवारीका चालकलाई लेन अनुशासन विपरीत सवारी चलाएको कसुरमा कारबाही गरिएको ।’
जल उत्पन्न प्रकोप नियन्त्रण विभागको गाडीका चालकलाई लेन अनुशासनको कारबाही गरिएको काठमाडौं उपत्यका ट्राफिकका प्रवक्ता एसएसपी जीवनकुमार श्रेष्ठले बताए ।
हेर्नुहोस् भिडियो
