काठमाडौं । नेकपा(एकीकृत समाजवादी)का सम्मानित नेता झलनाथ खनालले समाजवादी क्रान्तिको युगमा जनताको बहुदलीय जनवाद (जबज) मार्गदर्शक सिद्धान्त भन्नु लज्जास्पद भएको टिप्पणी गरेका छन् ।
आइतबार काठमाडौंमा आयोजित ‘नेपालमा समाजवादी क्रान्ति’ विषयक अन्तरक्रिया कार्यक्रममा उनले नेकपा (एमाले)का अध्यक्ष केपी शर्मा ओलीमा देखिएको परिवर्तन अधोपतन भएको बताए ।
उनले एमालेसँग एकीकृत समाजवादीको सैद्धान्तिक र वैचारिक भिन्नता प्रस्ट पारिनुपर्नेमा जोड दिए । समाजवादी संगठन निर्माण गर्न शक्तिशाली पार्टी चाहिने उनले बताए । सही कार्यदिशा लिएर अघि बढ्नुपर्ने आवश्यकता उनले औँल्याए ।
दक्षिणपन्थी अवसरवाद नतोडेसम्म समाजवादी क्रान्ति अघि बढ्न नसक्ने उनको भनाइ छ । उनले पार्टी तीन वर्ष पुग्न लाग्दा पनि हिजोको धङधङीबाट अघि बढ्न नसकेको टिप्पणी गरे ।
