इरानले होर्मुज स्ट्रेट खोल्ने घोषणा गरेपछि तेलको मूल्यमा ठूलाे गिरावट

काठमाडाैं। इरानका विदेशमन्त्री अब्बास अरागचीले होर्मुज स्ट्रेटलाई ‘युद्धविरामको बाँकी अवधि’सम्म व्यापारका लागि पूर्ण रूपमा खुला राख्ने घोषणा गरेपछि कच्चा तेलको मूल्यमा ठूलाे गिरावट आएको छ।

एक्स (ट्विटर) मा जारी गरेको बयानमा उनले भनेका छन्, ‘लेबनानमा युद्धविराम भएपछि सबै व्यावसायिक जहाजलाई होर्मुज़ स्ट्रेटबाट जाने बाटो युद्धविरामको बाँकी अवधिसम्म पूर्ण रूपमा खुला घोषणा गरिएको छ।’

अमेरिकाले यो हप्ताको सुरुवातमा होर्मुज स्ट्रेटमा नौसैनिक नाकाबन्दी सुरु गर्ने घोषणा गरेको थियो।

यसअघि इरानले फेब्रुअरीमा अमेरिका–इजरायल हमलाको जवाफमा विश्वको सबैभन्दा व्यस्त तेल ढुवानी मार्ग अर्थात् होर्मुज स्ट्रेटलाई धेरै हप्तासम्म प्रभावकारी रूपमा बन्द गरेको थियो।

इरान र अमेरिकाबीच दुई हप्ताको युद्धविराम लागू छ, जुन २२ अप्रिल मा समाप्त हुँदैछ।

इरानले अमेरिकासँग वार्ता गर्नुअघि लेबनानसहित पूरै मध्यपूर्वमा युद्धविरामको शर्त राखेको थियो। तर इजरायल र अमेरिकाले भनेका थिए कि युद्धविराम सम्झौतामा लेबनान समावेश छैन।

त्यतिबेला इरान र वार्तामा मध्यस्थता गरिरहेको पाकिस्तानले पनि युद्धविराममा लेबनानलाई समेत समावेश गर्नुपर्ने बताएको थियो।

यसैबीच, अमेरिका र युरोपका शेयर बजारहरूमा पनि उल्लेख्य वृद्धि देखिएको छ।

घोषणापछि ब्रेन्ट क्रुडको मूल्य ९० डलर प्रति ब्यारेलभन्दा तल झरेको छ, जबकि दिनको सुरुमा यो ९८ डलरभन्दा माथि थियो।
अमेरिकी मानक लाइट स्वीट क्रुडमा पनि उल्लेखनीय गिरावट दर्ज भएको छ।

संघर्ष सुरु हुनुभन्दा पहिले ब्रेन्ट क्रुड लगभग ७० डलर प्रति ब्यारेलभन्दा तल कारोबार भइरहेको थियो। मार्चको सुरुवातमा यो १०० डलरभन्दा माथि पुगेको थियो र सोही महिनाको अन्त्यतिर ११९ डलर प्रति ब्यारेलभन्दा बढीको स्तरमा पुगेको थियो।