हमासद्वारा चार इजरायली महिला सैनिक रिहा, बदलामा २०० प्यालेष्टिनी छुटे

एजेन्सी । प्यालेस्टिनी इस्लामिक लडाकू समूह (हमास)ले कैदी आदानप्रदान कार्यक्रमअन्तर्गत चारजना इजरायली महिला बन्धकलाई रिहा गरेको छ।

बन्धकहरूलाई सुपुर्दगी गरिएको गाजाको एक चोकमा रेडक्रसका चारवटा गाडीमा इजरायलतर्फबाट करिब २०० प्यालेष्टिनीलाई ल्याइ उनीहरू र चार इजरायली बन्धक महिलाको आदानप्रदान गरिएको एएफपीका एक संवाददाताले बताएका छन्।

इजरायली बन्धक र बेपत्ता परिवार फोरमका अनुसार रिहा हुनेमा करिना एरिभ, डानिएला गिल्बोआ, नामा लेवी र लिरी अल्बाग रहेका छन्।

अल्बाग १९ वर्षकी र अन्य सबै २० वर्षभन्दा माथिका इजरायली हुन्। गाजामा हमाससँग भएको युद्धविराम सम्झौताअन्तर्गत इजरायली जेलमा आजीवन कारावासको सजाय काटिरहेका १२० सहित २०० प्यालेस्टिनी कैदीको बदलामा चार जना इजरायली बन्धक सैनिकलाई मुक्त गरिएको प्यालेस्टिनी स्रोतले जनाएको छ।