सिन्धुली । बैंक लुटपाटको घटनाको अनुसन्धानका क्रममा प्रहरीले सिन्धुलीको खुर्कोटबाट ६० हजार अमेरिकी डलर बरामद गरेको छ । मंगलबार राति काठमाडौंबाट पूर्वतर्फ जाँदै गरेको बा १६ च ८०४८ नम्बरको सुमो गाडी जाँच गर्ने क्रममा उक्त रकम फेला परेको हो ।
बरामद गरिएको ६० हजार अमेरिकी डलर नेपाली रुपैयाँमा करिब १ करोड रुपैयाँ बराबरको रहेको प्रहरीले जनाएको छ । सिन्धुलीको घ्याङलेख गाउँपालिकास्थित नेपाल एसबीआई बैंक शाखामा भएको लुटपाटपछि खुर्कोट प्रहरीले सवारीसाधनहरूमा कडाइका साथ चेकजाँच गरिरहेको थियो । सोही क्रममा गाडीभित्रको झोलाबाट ठूलो परिमाणको विदेशी मुद्रा फेला परेको जनाइएको छ ।
हाल सिन्धुली प्रहरीको सम्पूर्ण जनशक्ति बैंक लुटपाट घटनाको अनुसन्धानमा खटिएको हुँदा डलर बरामद भएको विषयमा आधिकारिक विवरण सार्वजनिक गरिएको छैन । डलर बोकेको सुमो गाडी र त्यसमा संलग्न व्यक्ति हाल खुर्कोट प्रहरीको नियन्त्रणमा रहेका छन् ।
डलर बरामद भएको घटनाले बैंक लुटपाटसँग सम्बन्ध रहेको हुन सक्ने आशंकामा प्रहरीले थप अनुसन्धान अघि बढाएको छ ।
