असनमा शनिबार गुड्ने छैनन् गाडी, मौलिकता जोगाउन विशेष कार्यक्रम

काठमाडौं। असन क्षेत्रको प्राचीनता र मौलिकता पुनःस्थापित गर्न हरेक शनिवार सामाजिक, सांस्कृतिक तथा रैथाने व्यापारिक गतिविधि सञ्चालन गरिने भएको छ।

काठमाडौँ महानगरपालिकाले शुक्रबार पत्रकार भेटघाट कार्यक्रममार्फत ‘जीवन्त र समृद्ध असन’ अभियान सार्वजनिक गर्दै वैशाख ५ गतेदेखि नियमित कार्यक्रम सुरु गरिने जानकारी दिएको हो। कार्यक्रम वडा नम्बर २७ को नेतृत्वमा अन्नपूर्ण आरसीटी क्लब लगायत स्थानीय क्लब, टोल सुधार समिति, गुठियार तथा सरोकारवालाको सहभागितामा सञ्चालन हुनेछ।

महानगरपालिकाको सभा कक्षमा आयोजित कार्यक्रममा कार्यवाहक मेयर सुनिता डंगोल, प्रवक्ता नविन मानन्धर, प्रमुख प्रशासकीय अधिकृत सरोज गुरागाईं, सम्पदा तथा पर्यटन समितिका संयोजक आशामान संगत, वडा नम्बर २७ का अध्यक्ष योगेशकुमार खड्गी र वडा नम्बर २५ का अध्यक्ष राजेश डंगोललगायतको उपस्थिति रहेको थियो।

कार्यक्रम कःमिलाछी (कमलाक्षी) चोकदेखि असन, भोटाहिटीदेखि असन तथा महाबौद्धदेखि असनसम्मका क्षेत्रमा सञ्चालन हुनेछ। हरेक शनिवार सो क्षेत्रमा सवारी साधन प्रवेश निषेध गरिनेछ भने आगन्तुकलाई वैकल्पिक मार्ग प्रयोग गर्न आग्रह गरिएको छ।

महानगरपालिकाका अनुसार तीव्र सहरीकरण र सवारी चापका कारण असन क्षेत्रको परम्परागत पहिचान, सांस्कृतिक जीवनशैली र रैथाने व्यापार क्रमशः हराउँदै गएको छ। नुनदेखि सुनसम्म पाइने ऐतिहासिक बजारको पहिचान जोगाउन तथा पूर्खाको ज्ञान, सीप र संस्कृतिलाई पुस्तान्तरण गर्न यो अभियान थालिएको हो।

कार्यक्रमअन्तर्गत परम्परागत कला, संगीत, नृत्य, रैथाने सीप प्रदर्शन, सांस्कृतिक गतिविधि तथा परम्परागत व्यापार प्रवर्द्धन गरिनेछ। साथै, बालबालिका र ज्येष्ठ नागरिकलाई सुरक्षित र अवरोधरहित सडक प्रयोगको अवसर उपलब्ध गराउने लक्ष्य राखिएको छ।

यसै अवसरमा वैशाख ५ गतेदेखि निःशुल्क ‘वाटर एटीएम’ सेवा पनि सञ्चालनमा ल्याइने भएको छ। काठमाडौँ महानगरपालिका र उपत्यका खानेपानी व्यवस्थापन बोर्ड को सहकार्यमा निर्माण गरिएका ८ वटा वुथमार्फत राष्ट्रिय मापदण्डअनुसारको पिउने पानी निःशुल्क उपलब्ध गराइनेछ।

महानगरले असनसँगै वडा नम्बर २५ क्षेत्रमा पनि यस्तै कार्यक्रम विस्तार गर्ने तयारी गरेको जनाएको छ।