काठमाडौं। सम्पत्ति शुद्धीकरण कसृुरको अनुसन्धानमा पक्राउ परेका कांग्रेस नेता एवं पूर्व ऊर्जामन्त्री दिपक खड्कालाई रिहा गर्न सर्वोच्च अदालतले आदेश दिएको छ।
सर्वोच्चका कायममुकायम प्रधानन्यायाधीश सपना प्रधान मल्ल र न्यायाधीश श्रीकान्त पौडेलको बिहीबारको संयुक्त इजलासले खड्कालाई थुनामुक्त गर्न आदेश दिएको हो। तर, विदेश जान भने उनले अदालतको अनुमति लिनुपर्ने छ।
पूर्वमन्त्री खड्काको तर्फबाट उनकी पत्नी विनिता थापाले दायर गरेको बन्दीप्रत्यक्षीकरणको रिटमा सर्वाेच्चको आदेश आएको हो।
सर्वोच्च अदालतले सरकारी पक्षले प्रस्तुत गरेको आधार, कारण तथा मिसिल संलग्न प्रमाणको विवेचना गर्दा तथा अदालतबाट प्रतिपादित सिद्धान्त समेतको आधारमा खड्कालाई हिरासतमा राख्दा उचित विधि र प्रक्रिया पूरा गरेको नदेखिएको जनाएको छ।
आदेशमा भनिएको छ, ‘निवेदकलाई हिरासतमा राख्दा उचित विधि र प्रक्रिया पूरा गरेको देखिएन। निजको पक्राउ पूर्जी र म्याद थप कानुनसंगत देखिएन।’
उनलाई हिरासत बाहिर राखेर मुद्दाको अनुसन्धान गर्न सकिने किसिमको रहेको सर्वोच्चले ठहर गरेको छ। ‘निजमाथिको दाबी कसुरको अनुसन्धान हिरासत बाहिर नै हुन सक्ने प्रकृतिको देखिँदा सम्बन्धित अदालतबाट अनुमति लिई मात्र निवेदकलाई विदेश जान दिनू र निजलाई तत्काल थुनामुक्त गर्नु भनी बन्दीप्रत्यक्षीकरणको आदेश जारी हुने ठहर्छ,’ आदेशमा भनिएको छ।
