काठमाडौँ। एसीसी प्रिमियर कपको उपाधि जितेसँगै नेपाल आगामी एसिया कपका लागि छनोट भएको छ।
मलेसियाको क्वालालम्पुरमा शनिबार भएको फाइनलमा नेपालले यूएईलाई ४४ रनले पराजित गर्दै एसिया कपमा स्थान पक्का गरेको हो।
नेपालले दिएको ३१४ रनको लक्ष्य पछ्याएको यूएई ४९.२ ओभरमा २६८ रनमै अलआउट भयो। उसका लागि राहुल चोप्राले १०५ बलमा ३ चौका र ४ छक्कासहित १०५ रन बनाए। शोयब खानले ५२ र तानिस सुरीले ४२ रन जोडे।
नेपालका लागि करण केसीले तीन तथा ललित राजवंशीले दुई विकेट लिए। सन्दीप लामिछाने, दीपेन्द्रसिंह ऐरी, रोहित पौडेल र गुल्सन झाले एक–एक विकेट लिए।
यसअघि नेपालले आसिफ शेखको शतकमा ९ विकेट गुमाएर ३१३ रन बनाएको थियो। आसिफले १०६ बलमा ८ चौका र ४ छक्कासहित १०४ रन बनाए। गुल्सन झाले ५२, अर्जुन कुमालले ४३ र रोहित पौडेलले ४० रनको योगदान दिए।
प्रिमियर कपको विजेता टोली एसिया कपमा छनोट हुने प्रावधानअनुसार नेपालले अब एसिया कप खेल्नेछ। आयोजक बंगलादेशसँगै भारत, पाकिस्तान, श्रीलंका र अफगानिस्तान यसअघि नै छनोट भइसकेका छन्। आगामी एसिया कप बंगलादेशमा हुनेछ।
