काठमाडौं । प्यालेस्टाइनको सशस्त्र समूह हमासको नियन्त्रणमा रहेका नेपाली विद्यार्थी विपीन जोशी रिहा हुन लागेको खबर सामाजिक सञ्जालमा भाइरल बनिरहेको छ । सामाजिक सञ्जालका प्रयोगकर्ताले विपीन रिहा हुन लागेको भन्दै दुईवटा सूचना स्रोतलाई आधार मानेको देखिन्छ ।
विपीन जोशीको नाम लेखिएको एउटा स्क्रिनसट, जसलाई हमासको बन्धनबाट रिहा हुनेहरूको ५८औँ नम्बरमा विपीनको नाम रहेको दाबी गरिँदै छ ।
अर्को इजरायली सञ्चारमाध्यम टाइम्स अफ इजरायलले विपीन रिहा हुन लागेको समाचार लेखेको छ । ५८औँ नम्बरमा विपीनको नाम लेखिएको स्क्रिनसट हमासको बन्धनबाट मुक्त हुनेहरूको सूची होइन । हमासको बन्धनमा परेकाहरूका परिवार र आफन्तजनहरूले ‘होस्टेज एन्ड मिसिङ फ्यामिली फोरम’ नामको एउटा संस्था खोलेका छन् । उक्त संस्थाले ‘स्टोरिज डट ब्रिङ देम होम नाऊ डट नेट’ नामको वेबसाइट चलाउँछ ।
यस वेबसाइटमा हमासले बन्धक बनाएकाहरूको नाम, फोटो र उनीहरूका परिवारको भनाइ राख्ने गरिन्छ । रिहा हुनेहरूको ५८औँ नम्बरमा विपीन जोशीको नाम लेखिएको भन्दै सामाजिक सञ्जालमा हालिएको स्क्रिनसट यही वेबसाइटबाट लिइएको हो ।
यस वेबसाइटले हमासको बन्धनमा रहेकाहरूको सूची निकालेको छ । सूचीको ५८औँ नम्बरमा विपीन जोशीको नाम लेखिएको छ ।
अर्कोतर्फ, इजरायली समाचार संस्था टाइम्स अफ इजरायलले विपीन रिहा हुँदै भनेर समाचार लेखेको छैन । स्थानीय समयअनुसार २९ जनवरी साँझ ९ः१८ बजे टाइम्स अफ इजरायलले पाँच थाई नागरिकसहित तीन इजरायली रिहा हुँदै भनेर समाचार लेखेको छ ।
उक्त समाचारमा तीन इजरायली र पाँच थाई नागरिक रिहा हुन लागेको लेखिएको छ । रिहा हुने पाँच थाई नागरिकको नाम भने सार्वजनिक नभएको समाचारमा उल्लेख छ । समाचारमा लेखिएको छ, “गाजामा एक नेपाली र एक तान्जानियनसहित आठ थाई बन्धकहरू अझै छन् ।“
उता इजरायलका लागि नेपाली राजदूत धनप्रसाद पण्डितले मिडियामा आयजस्तो विपीनको रिहा हुने सूचीमा आधिकारिक नाम नआएको बताउँछन् ।
उनले मिडियाले अनावश्यक रूपमा विपिन छुट्न लागेको भन्दै प्रचार गरेकोमा आक्रोश समेत पोखेका छन् । गाजामा युद्धविरामपछि पहिलो दिन तीन जना बन्धक छुटेका थिए भने दोस्रोपटक चारजना छुटेका थिए । बिहीबार थप तीन जना इजरायली नागरिकसहित पाँच जना थाई नागरिक छुट्दैछन् ।
दुई जना थाई नागरिक मारिसकिएको भनिएको छ । उनीहरूको शव कहिले आउँछ भन्ने खुलेको छैन । उनका अनुसार आजको रिहाइपछि अहिलेसम्मको हिसाबमा हमासको कब्जामा अब बाँकी विदेशीमा दुई जना रहने छन् । जसमा एक जना थाई र एक जना नेपाली छन् । उनीहरूको रिहाइको बारेमा अहिलेसम्म हामीलाई आधिकारिक जानकारी प्राप्त भएको छैन ।
उनले भने,‘विपीनबारे खबर भाइरल भएपछि धेरैले मलाई यसबारे सोधखोज गर्नुभयो । त्यसपछि मैले पनि बुधबार राति नै इजरायलको प्रधानमन्त्री कार्यालयअन्तर्गत बन्दीसम्बन्धी मामिला हेर्ने सल्लाहकारलाई फोन गरेँ । उहाँले फोन उठाउनुभएन । पछि म्यासेज गर्दा उहाँले ‘सरी वी डन्ट ह्याभ एनी अपडेट अनटिल नाउ’ भनेर जवाफ फर्काउनुभयो । ’
उनले थपे, ‘शनिबारबारसम्म अर्को लट छाड्छ रे । हामी त्यसको वेटिङमा छौँ । विपिनको अवस्थाबारे हामीसँग थप प्रमाण र औपचारिक जानकारी नभएको हुनाले त्यसै बोल्ने कुरा भएन ।’
उनले विपिन जोशीको प्रतीक्षामा सिंगो देश नै स्वागत गर्न आतुर रहेको भन्दै अहिलेसम्म रिहा हुने सूचीमा आधिकारिक रूपमा नाम नआएको बताए ।
