सिटिजन बैंकको नयाँ बचत खाता, जसले गर्छ ग्राहकको स्वास्थ्य र धनको बचत

काठमाडौं । सिटिजन बैंक इन्टरनेशनलले स्वास्थ्य र धन बचत खाता नामक नयाँ बचत खाता सञ्चालनमा ल्याएको छ।

कम्पनीले ग्राहकको स्वास्थ्य र धनलाई सुरक्षा गर्ने उद्धेष्यले “हामी तपाईको स्वास्थ्य र धनको ख्याल राख्छौं” भन्ने मुल नाराका साथ उक्त बचत खाता सञ्चालनमा ल्याएको हो ।

कम्पनीकाअनुसार ग्राहकहरुले यस बचत खातामार्फत स्वास्थ्य र धन गरि दुई वटा फाइदा लिन सक्नेछन्। जसमा ग्राहकले वर्षमा एक पटक निःशुल्क सम्पूर्ण शरिर जाँच्न र परामर्श लिन पाउने सुविधा छ । साथै कम्पनीका ग्राहकहरुले निःशुल्क रुपमा दन्त,छाला परामर्श, आँखाको परामर्श पनि लिन सक्नेछन् ।

त्यस्तै, यस बचत खाता अन्तरगत ईफार्मेसीद्वारा सञ्चालित निःशुल्क डेलिभरी र चिकित्सा खरिदमा विशेष छूट पाइन्छ । ग्राहकहरुले इस्पामा पनि विशेष छूटको लाभ लिन सक्ने कम्पनीले बताएको छ ।

त्यस्तै, अर्को सुविधाअन्तर्गत ग्राहकले धेरै प्रकारका धन सम्बन्धि फाइदाहरु लिन सक्नेछन् । यस बचत खातामा खाता भएका ग्राहकले ५.१५ प्रतिशतसम्म उच्चतम ब्याजदर पाउने छन् । खाता खोलेको पहिलो वर्ष इन्टरनेट बैंकिङ्ग, मोबाइल बैंकिङ्ग र डेबिटमा कार्डमा कुनै पनि शुल्क नलाग्ने कम्पनीको भनाइ छ । जसमा एक वर्षसम्म यी सबै सुविधा निःशुल्क रहने छ ।

त्यस्तै, कम्पनीले यो बचत खाता लिने ग्राहकहरुका लागि लकरको वार्षिक शुल्कमा ५० प्रतिशतसम्म छूट र न्यूनतम ब्यालेन्स ३ लाख रुपैयाँको लकर मौजदातमा १०० प्रतिशत छूटको व्यवस्था गरेको छ । साथै, १ लाख रुपैयाँ सीमा भएको मेडिकल क्रडिट कार्ड जारी शुल्कमा १०० प्रतिशत छूटको पनि व्यवस्था छ।

ग्राहकले सिटिजन क्यापिटलद्वारा प्रस्तावित पीएमएस सेवाहरुमा ५० प्रतिशतसम्म छूट पाउने छन् भने सीबीआइएल सेक्युरिटिजमा ब्रोकर खाता पनि निःशुल्क खोल्न सक्ने छन् ।

यसका साथै कम्पनीले यस बचत खाताबाट प्रत्येक महिना कम्तिमा १०० रुपैयाँसम्म खाताबाट कट्टा हुने गरी आकस्मिक कोष पनि खडा गर्ने व्यवस्था गरेको छ । यो कोषको पैसा आकस्मिक अवस्थामा ग्राहकले निकाल्न भने पाइन्छ र त्यस कोषमा रहेको रकमको ब्याजदर पनि मुद्दती खाता सरह नै पाइन्छ ।

यस बचत खातामा विदेशी मुद्रा खरिदबिक्री गर्दा ०.१० पैसा छूट पाउने व्यवस्था पनि छ । ग्राहकले डलर ट्राभल कार्ड जारी गर्दा २५ प्रतिशतसम्म छूट पाउने छन् । साथै, इकोम कार्ड जारी गर्ने शुल्कमा ५० प्रतिशतसम्म छूटको व्यवस्था छ । यो खातामार्फत ग्राहकले माथि उल्लेखितमात्र नभइ अन्य सुविधाहरु पनि पाउने कम्पनीले बताएको छ ।