काठमाडौं । देशका अधिकांश स्थानमा वर्षा हुने भएकाले आइतबार नदीतटीय क्षेत्रका बासिन्दालाई सतर्कता अपनाउन जल तथा मौसम विज्ञान विभाग, बाढी पूर्वानुमान महाशाखाले आग्रह गरेकाे छ । विभिन्न जिल्ला भएर बहने नदीहरूमा आकस्मिक बहाव बढ्न सक्ने भन्दै नदीतटीय क्षेत्रका बासिन्दालाई बाढी तथा डुबानबाट जाेगिन आवश्यक सतर्कता अपनाउन महाशाखाले आग्रह गरेकाे हाे ।
विभागका अनुसार आगामी २४ घण्टामा देशका केही स्थानमा भारी वर्षा तथा कोशी, बागमती, गण्डकी र लुम्बिनी प्रदेशका एक–दुई स्थानमा अधिक वर्षाको सम्भावना छ । विभागले ती क्षेत्रमा हुन सक्ने गेग्रान बहाव, बाढी तथा पहिरोबाट बच्न तथा त्यसबाट ती क्षेत्रहरूमा दैनिक जनजीवनलगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेकाले सतर्कता अपनाउन अनुरोध गरेको हाे ।
बाढी पूर्वानुमान महाशाखाका अनुसार आज ताप्लेजुङ, संखुवासभा, सर्लाही, रौतहट, बारा, पर्सा, मकवानपुर, नवलपरासी, पाल्पा, तनहुँ, स्याङ्जा, पर्वत, म्याग्दी, बाग्लुङ, दाङ, रोल्पा, बाँके, बर्दिया र आसपासका जिल्ला भई बहने अधिकांश स-साना नदीहरूमा पानीकाे बहाव बढ्नेछ ।
यसका साथै अन्य केही स-साना नदीमा आकस्मिक बाढीको मध्यम जोखिम रहने पूर्वानुमान महाशाखाले गरेकाे छ । साथै इलाम, तेह्रथुम, पाँचथर, भोजपुर, उदयपुर, रामेछाप, दोलखा, सिन्धुपाल्चोक, चितवन, लमजुङ, रुपन्देही, कपिलवस्तु, अर्घाखाँची, प्युठान, सल्यान, दैलेख, कैलाली, कञ्चननपुर, डोटी, डडेल्धुरा र आसपासका जिल्ला भई बहने स-साना नदीहरूमा पनि बहाव बढ्ने तथा केही स-साना नदीमा आकस्मिक बाढीको जोखिम रहने जनाइएकाे छ ।
