काठमाडौं । रोटरी डिस्ट्रिक्ट ३२९२ नेपाल भूटानको सहकार्यमा यज्ञप्रसाद आचार्यको स्मरणमा रू. १ लाख १ हजार राशीको ‘यज्ञप्रसाद आचार्य रोटरी जर्नो लाइफटाइम अचिभमेन्ट अवार्ड’ नामक सम्मान–पुरस्कार स्थापना गरिएको छ ।
उक्त पुरस्कार जीवनको लामो समय पत्रकारिता, सञ्चारिकरण र साहित्यिक पत्रकारितामार्फत नेपाली समाजको श्रीवृद्धिमा अविस्मरणीय योगदान पुर्याउनुहुने व्यक्तित्वलाई सम्मानस्वरूप प्रदान गरिनेछ ।
पुरस्कार यसै वर्षदेखि प्रत्येक २ (दुई) वर्षमा वितरण गरिने स्वर्गीय आचार्यका छोरा वरिष्ठ पत्रकार एवं रोटरियन सुरेश आचार्यले बताए ।
स्वर्गिय आचार्यले विसं २००३ सालमा भाषाशास्त्री गुरू महानन्द सापकोटाको सल्लाहमा धरानबाट छात्रवाणी पत्रिका सम्पादन र सञ्चालन गरी पत्रकारिताको यात्रा शुरू गरेका थिए ।
उक्त पुरस्कारको निमित्त हुने चयन र सञ्चालनको सम्पूर्ण जिम्मेवारी रोटरी डिस्ट्रिक्टलाई प्रदान गरिएको छ । सो पुरस्कार सम्बन्धी सहमतिपत्रमा रोटरी डिस्ट्रिक्ट ३२९२ का गभर्नर राजेन्द्रप्रसाद ध्वजु र संस्थापकका तर्फबाट स्वर्गीय यज्ञ प्रसाद आचार्यका छोरा सुरेश आचार्यले बिहीबार रोटरी भवन, थापाथलीमा हस्ताक्षर गरेका छन् ।
सो अवसरमा डिस्ट्रिक्ट गभर्नर नोमिनी विनोद कोइराला तथा डिस्ट्रिक्ट सेक्रेटरी डा.दिनेश मानन्धरको पनि उपस्थिति रहेको थियो ।
स्व.आचार्यले २०२० सालमा ‘मुक्तात्मा’ र २०६५ सालमा ‘फ्यूजनको जगमा शिलान्यास’ कथा संग्रह प्रकाशन गरेका छन् । साथै, “निर्वाचनोप्रान्त नेपालको परराष्ट्र नीति“ नामक पुस्तक २०१८ सालमै प्रकाशन भएको थियो ।
स्वर्गिय आचार्य धरान नगरपालिकामा २०१६ सालमा जनप्रतिनिधिका रूपमा निर्वाचित भइ २०२५ सालसम्म कृयाशील रहदा नेपालमै पहिलो पटक धरानमा २०२० सालमा सामुदायिक विधुतीकरण, विधालयमा नि:शुल्क शिक्षा लगायत साहित्य र पत्रकारिताका जस्ता सामाजिक कार्यहरू संचालन गरिएका थिए ।
उनको सम्पादकत्व र प्रकाशत्वमा २०३९ सालमा नवजागरण साप्ताहिक प्रकाशित गरिएको थियो । उहककाले वि.सं. २००० सालदेखि २०७० सम्मको नेपालको रूपान्तरणको एक साक्षीका रूपमा वृहत पुस्तक लेखेका छन् ।
उनको राजनीतिक, संवैधानिक, आर्थिक, शैक्षिक, राष्ट्रियता, परराष्ट्र सम्बन्ध, सामाजिक विषयमा सैयौं लेखरचनाहरू प्रकाशित भएका छन् । आचार्य वि.सं २००६ सालमा धरानबाट म्याट्रिक परीक्षा र २०१२ सालमा बनारस हिन्दू विश्वविधालयबाट एमए, एलएलएम गर्ने धरानका पहिलो व्यक्ति थिए । आचार्य मदन मोहन मालवीय पुरस्कारबाट पनि सम्मानित भएका थिए ।
