काठमाडौं । जेन–जेड आन्दोलन सुरु भएको एक महिना पूरा भएको अवसरमा आन्दोलनका क्रममा घाइते भएका व्यक्तिहरूलाई सहयोग पुर्याउँदै आएकी समाजसेवी आशिका तामाङलाई ‘भीम–माया स्मृति पुरस्कार–२०८२’ प्रदान गरिएको छ।
बाबुआमाको सम्झनामा स्थापना गरिएको सो पुरस्कारमार्फत तामाङलाई रु ५० हजार नगदसहित सम्मानपत्र प्रदान गरिएको हो।
२०६२ सालमा स्थापना गरिएको यो पुरस्कार हरेक वर्ष सामाजिक सेवा र मानवताका क्षेत्रमा योगदान दिने व्यक्तिलाई प्रदान गर्दै आएको छ। गत वर्ष यो पुरस्कार जाजरकोट भूकम्प पीडितका लागि राहत सहयोगका रूपमा प्रयोग गरिएको थियो।
सुरुवाती वर्षमा रु १० हजारबाट सुरु गरिएको पुरस्कारको रकम २०७५ सालदेखि बढाएर रु ५० हजार पुर्याइएको हो।
आशिका तामाङले जेन–जेड आन्दोलनका क्रममा घाइते भएका युवाहरूलाई उपचार, औषधि र सहयोग जुटाउने कार्य गर्दै आएकी छन्। त्यस योगदानको कदर गर्दै उनलाई यो वर्षको भीम–माया स्मृति पुरस्कार प्रदान गरिएको हो।
