काठमाडौं । खाडी मुलुकका उडानहरू रद्द हुँदा त्रिभुवन अन्तर्राष्ट्रिय विमानस्थलमा अलपत्र परेका सयौं यात्रु आज गन्तव्यतर्फ उड्न थालेका छन्। कतारको आकाश पुनः खुला भएसँगै सोमबार राति स्थगित गरिएका उडानहरू क्रमशः सञ्चालनमा आएका हुन्।
सोमबार राति ११:३० बजे नेपाल एयरलाइन्स र हिमालय एयरलाइन्सका दोहा गन्तव्यतर्फका उडानहरू अचानक रद्द भएपछि वैदेशिक रोजगारीका लागि गइरहेका धेरै यात्रुहरू विमानस्थलमै अलमलमा परेका थिए। इरानद्वारा कतारमाथि आक्रमणको आशंकापछि खाडी क्षेत्रको आकाश प्रभावित भएपछि उक्त निर्णय लिइएको थियो।
विमानस्थलका महाप्रबन्धक जगन्नाथ निरौलाका अनुसार, कतारबाट काठमाडौं फर्किनुपर्ने आज बिहानको एक उडान पनि रद्द भएको थियो। तर आकाश खुला भएसँगै पुनः नियमित उडानहरू सञ्चालनमा आउने विश्वास व्यक्त गरिएको छ।
नेपाल एयरलाइन्सका प्रवक्ता सुवास डाँगीले जानकारी दिएअनुसार, सोमबारका लागि निर्धारित २६९ जना यात्रुहरूलाई आजै दोहा पठाउने तयारी पूरा भएको छ। उनले कतारको परिस्थितिका कारण अन्य खाडी गन्तव्यतर्फका उडानहरूमा पनि केही ढिलाइ हुने संकेत दिएका छन्।
सोमबार राति आक्रमणको सूचना प्राप्त भएपछि बोर्डिङ प्रक्रिया चलिरहेका बेला नै उडान स्थगित गरिएको थियो। अधिकांश यात्रु वैदेशिक रोजगारीका लागि गइरहेका थिए, जसले गर्दा उनीहरूमा तनाव र अन्योल उत्पन्न भएको थियो।
हाल त्रिभुवन अन्तर्राष्ट्रिय विमानस्थलबाट नेपालका तीनसहित ३० वटा अन्तर्राष्ट्रिय वायुसेवा कम्पनीहरूले नियमित उडान सञ्चालन गर्दै आएका छन्। सुरक्षा अवस्थाको स्थायित्वसँगै उडान तालिका क्रमशः सामान्य बन्दै जाने विमानस्थल प्रशासनको अपेक्षा छ।
