काठमाडौं। नेपाल प्रिमियर लिग (एनपीएल) को तेस्रो संस्करणअघि जनकपुर बोल्ट्सले राष्ट्रिय टोलीका ओपनरसमेत रहेका आसिफ शेखलाई टोलीबाट रिलिज गरेको छ। एनपीएलको इतिहासमा कुनै टोलीले आफ्नो मार्की खेलाडीलाई रिलिज गरेको यो पहिलो घटना हो।
आसिफ एनपीएलका पहिलो दुई संस्करणमा लगातार जनकपुरका मार्की खेलाडीका रूपमा आबद्ध थिए। तर तेस्रो संस्करणका लागि टोली पुनर्संरचना गर्ने क्रममा जनकपुरले उनलाई टोलीबाट मुक्त गर्ने निर्णय गरेको हो।
जनकपुरले आसिफसहित कुल सात खेलाडीलाई रिलिज गरेको छ। टोलीबाट बाहिरिने अन्य खेलाडीमा किशोर महतो, शुभ कंसाकार, तुलबहादुर थापा, पप्पु यादव, सचिन भट्ट र रुपेश सिंह रहेका छन्।
एनपीएलको नियमअनुसार टोलीहरूले मार्की खेलाडीसहित अधिकतम सात खेलाडीलाई आगामी सिजनका लागि रिटेन गर्न पाउने व्यवस्था छ। तर जनकपुरले पाँच खेलाडीलाई मात्रै टोलीमा कायम राख्ने निर्णय गरेको छ।
जनकपुरले रिटेन गरेका खेलाडीहरूमा ललित राजवंशी, अनिल साह, मयान यादव, विकास आग्री र आदित्य महता रहेका छन्।
जनकपुर बोल्ट्सले एनपीएलको पहिलो संस्करणमा उत्कृष्ट प्रदर्शन गर्दै उपाधि जितेको थियो। तर दोस्रो संस्करणमा भने टोलीको प्रदर्शन कमजोर रह्यो र लिग तालिकाको पुछारमा रहँदै आठौँ स्थानमा सीमित भयो।
दोस्रो सिजनको निराशाजनक नतिजापछि जनकपुरले तेस्रो संस्करणअघि टोलीमा व्यापक फेरबदल गरेको हो। मार्की खेलाडी आसिफ शेखलाई रिलिज गर्ने निर्णयलाई आगामी सिजनका लागि नयाँ रणनीति र टोली निर्माणको संकेतका रूपमा हेरिएको छ।
