काठमाडौं । नेपाली कांग्रेसकी वरिष्ठ नेतृ, पूर्व उपसभापति, पूर्व उपप्रधानमन्त्री तथा प्रजातान्त्रिक योद्दा शैलजा आचार्यको १५ औं स्मृति दिवस कार्यक्रम काठमाडौंमा सम्पन्न भएको छ ।
नेपालका प्रथम राष्ट्रपति, पूर्व सभामुख, नेपाली कांग्रेसका वरिष्ठ नेताहरु, पूर्व मन्त्रीहरु, नेपाली कांग्रेसका केन्द्र, प्रदेश, जिल्ला तथा नगर समिति तथा जनवर्गिय संगठनका नेता, कार्यकर्ता, शुभचिन्तक, आचार्यका परिवारका सदस्यहरु, सेवा कृष्ण प्रसाद कोइराला सेवा गुठी तथा शैलजा आचार्य स्मृति पोलिटेक्निकका पदाधिकारी तथा कार्यसमिति सदस्यहरुको बृहत्त उपस्थितिमा सो स्मृति दिवस सोमबार सम्पन्न मनाइएको हो ।
कार्यक्रममा नेतृ शैलजा आचार्यले नेपालको प्रजातान्त्रिक आन्दोलनमा पुरयाएको योग्दानबारे चर्चा गर्दै सभाका वक्ताहरुले नेतृ आर्चाय निष्ठा, लगन र इमानको त्रिवेणी भएको बताएका थिए ।
एक अदम्य साहस एवं उत्साहले भरिएकी नेतृ आर्चायले वीपीका विचारलाई नागरिकसम्म पुर्याउने सन्दर्भमा महत्वपूर्ण भूमिका निर्वाह गरेको बताउँदै नेतृ आचार्यले अंगालेको राजनैतिक मूल्य, मान्यता, आर्दश एवं परम्परालाई आत्मसाथ गर्न सकेमात्र आजको नेपाली कांग्रेसले आफ्नो राजनीति भविष्य सुरक्षित गर्न सक्ने कार्यक्रमका वक्ताहरुले बताएका थिए ।
नेतृ आचार्यले सरकारमा रहदा साना जलबिद्युत आयोजनाको ढोका खोल्ने काम गरेको भन्दै नेपालले आफ्नै लगानीमा पनि जलविद्युत आयोजना सम्पन्न गर्न सक्छ भन्ने दृष्टान्त समेत आर्चायकै पालामा स्थापित भएको स्मरण समेत कार्यक्रममा वक्ताहरुले गरेका थिए ।
कार्यक्रमका प्रमुख अतिथि पूर्व राष्ट्रपति रामवरण यादब, विशिष्ट अतिथि पूर्व सभामुखद्वय दमननाथ ढुंगाना, तारानाथ रानाभाट, पूर्व मन्त्री ओमकार श्रेष्ठ, नेपाली कांग्रेसका वरिष्ठ नेता शेखर कोइराला, नेता शंशाक कोइराला, डा.मिनेन्द्र रिजाल, महेश आर्चाय, पूर्व मुख्य सचिव विमल प्रसाद कोइराला लगायतले आचार्यले नेपालको प्रजातान्त्रिक आन्दोलन, राष्ट्रियता र विकासका सन्दर्भमा दिएको योगदानबारे मन्तव्य राखेका थिए ।
सभाको अध्यक्षता कृष्ण प्रसाद कोइराला सेवा गुठी तथा शैलचा आर्चाय स्मृति पोलिटेक्निककी अध्यक्ष मीता आर्चायले गरेकी थिइन्, भने कार्यक्रमको समुद्घाटन समारोहको सञ्चालन सेवा गुठीकी सदस्य सचिव रश्मी पोखरेलले गरेकी थिइन् । नेतृ शैलजा आर्चाय कृष्ण प्रसाद कोइराला सेवा गुठीकी संस्थापक अध्यक्ष समेत रहेकी थिइन् ।
