काठमाडौं। नेकपा एमालेले पार्टीको स्थायी कमिटी र केन्द्रीय कमिटीमा नयाँ सदस्य थप गरेको छ। अध्यक्ष केपी शर्मा ओलीले ७ जनालाई स्थायी कमिटी सदस्य तथा ३३ जनालाई केन्द्रीय कमिटी सदस्यमा मनोनीत गरेका हुन्।
सचिवालय बैठकपछि बिहीबार बसेको केन्द्रीय कमिटी बैठकमा मनोनयनसम्बन्धी निर्णयबारे जानकारी गराइएको हो।
अध्यक्ष ओलीले ईश्वर पोखरेल, थममाया थापा, लालबाबु पण्डित, प्रदीप ज्ञवाली, काशीनाथ दवाडी, देवराज घिमिरे र शिवमाया तुम्बाहाम्फेलाई स्थायी कमिटी सदस्यमा मनोनीत गरेका छन्।
यससँगै पार्टीको उच्च तहको स्थायी कमिटीमा पूर्वउपाध्यक्ष, पूर्वमन्त्री तथा पार्टीका विभिन्न जिम्मेवारीमा रहिसकेका नेताहरूलाई समेटिएको छ। पूर्वराष्ट्रपति विद्यादेवी भण्डारीलाई वरिष्ठ नेता बनाउने निर्णयसँगै स्थायी कमिटी विस्तारको निर्णय पनि एमालेको संगठनात्मक पुनर्संरचनाको महत्वपूर्ण कदमका रूपमा आएको छ।
त्यस्तै, एमालेले ३३ जनालाई केन्द्रीय कमिटी सदस्यमा मनोनीत गरेको छ।
मनोनीत हुनेमा काशीनाथ अधिकारी, देवराज घिमिरे, हरि रिजाल, पासाङ शेर्पा, नरेन्द्र भट्टराई, नन्दराम देवकोटा, धर्म गिरी, नारायण घर्ती, विद्यासुन्दर शाक्य, शान्तिलाल महत, पोल्तेन छेपाङ गुरुङ, प्रेम दङ्गाल, सुरेन्द्र उदास, विनोद पाण्डे, पुष्पराज श्रेष्ठ, विमला घिमिरे, शिवमाया तुम्बाहाम्फे, कौशिला खत्री, जानुका सिम्खडा र बिना बास्तोलालगायत छन्।
त्यसैगरी मोहम्मद इस्तियाक राई, प्रदीप यादव, अब्दुल हुसैन अंसारी, डिडि कार्की, भवानी खापुङ, दीपक साउद, जय गोले, धर्मराज निरौला, रवि चामलिङ, विनोद पहाडी, श्रीप्रसाद शर्मा, रामप्रीत राम र ध्रुव विष्ट पनि केन्द्रीय कमिटी सदस्यमा मनोनीत भएका छन्।
स्थायी कमिटी र केन्द्रीय कमिटीमा नयाँ सदस्य थपिएसँगै एमालेको नेतृत्व संरचना थप विस्तार भएको छ।
पार्टीको आन्तरिक संगठन व्यवस्थापन तथा आगामी राजनीतिक गतिविधिलाई लक्षित गर्दै पछिल्लो समय एमालेले नेतृत्व तहमा विभिन्न निर्णय गर्दै आएको छ।
