काठमाडाैं। परीक्षाका सम्पूर्ण प्रक्रिया पूरा भइसकेपछि अन्तिम नतिजा प्रकाशनमा ढिलाइ नगर्न सर्वोच्च अदालतले लोक सेवा आयोगलाई आदेश दिएको छ।
बुधबार न्यायाधीश सुनिलकुमार पोखरेलको एकल इजलासले मनबहादुर थापालगायतले दायर गरेको रिटमा सुनुवाइ गर्दै परीक्षाको अन्तिम नतिजा प्रकाशन गर्न नरोक्न अन्तरिम आदेश दिएको हो।
निवेदकहरूले प्रशासन सेवा, सामान्य प्रशासन समूहअन्तर्गत राजपत्राङ्कित द्वितीय श्रेणीका पाँचवटा विज्ञापन (१६६७९, १६६८०, १६६८१, १६६८२ र १६८३) मा लिखित परीक्षा सम्पन्न भई अन्तर्वार्तासमेत सकिएपछि पनि लोक सेवा आयोगले अन्तिम नतिजा प्रकाशनमा ढिलाइ गरेको भन्दै रिट दायर गरेका थिए।
सर्वोच्चले परीक्षाको सम्पूर्ण प्रक्रिया पूरा भइसकेको अवस्थामा यथाशीघ्र परीक्षाफल प्रकाशन हुनु उम्मेदवारहरूको वैधानिक अपेक्षा हुने उल्लेख गरेको छ।
आदेशमा भनिएको छ, ‘निवेदकहरूसमेत सहभागी भई अन्तर्वार्ता समेत सम्पन्न भई परीक्षाका सम्पूर्ण प्रक्रिया पूरा भइसकेको भन्ने निवेदन व्यहोराबाट देखिएको अवस्थामा यथाशीघ्र परीक्षाफल प्रकाशन हुनु निवेदकहरूसमेतको वैधानिक अपेक्षा रहन्छ।’
लोक सेवा आयोग ऐन, २०७९ को दफा २९ (१) तथा लोक सेवा आयोग (कार्य सञ्चालन) निर्देशिका, २०७९ को दफा ६५ को प्रतिबन्धात्मक वाक्यांशमा समेत पदपूर्तिका लागि उम्मेदवार छनोटसम्बन्धी परीक्षाको सम्पूर्ण प्रक्रिया पूरा भएपछि अन्तिम नतिजा प्रकाशन गर्नुपर्ने व्यवस्था रहेको सर्वोच्चले उल्लेख गरेको छ।
‘लोक सेवा आयोग ऐन, २०७९ को दफा २९ (१) बमोजिम पदपूर्तिका लागि उम्मेदवारहरुको छनोट सम्बन्धी परीक्षामा सम्पूर्ण प्रक्रिया पूरा भएपछि अन्तिम नतिजा प्रकाशन गर्नुपर्ने भन्ने र लोक सेवा आयोग (कार्य सञ्चालन) निर्देशिका, २०७९ को दफा ६५ को प्रतिबन्धात्मक वाक्यांशमा समेत यस्तै प्रकृतिको व्यवस्था रहेको पाइयो’, आदेशमा भनिएको छ।
परीक्षाका सम्पूर्ण प्रक्रिया पूरा भइसकेको अवस्थामा अन्तिम नतिजा यथाशीघ्र प्रकाशन गर्नुपर्ने देखिए पनि हालसम्म नतिजा प्रकाशन नभएको भन्दै सर्वोच्चले अन्तिम नतिजा प्रकाशन गर्न नरोक्न अन्तरिम आदेश दिएको हो।
यसैगरी, विपक्षी लोक सेवा आयोगलाई १५ दिनभित्र लिखित जवाफ पेस गर्न पनि सर्वोच्च अदालतले आदेश दिएको छ।
