काठमाडौं। प्रधानमन्त्री बालेन शाहले संविधान जतिसुकै राम्रो भए पनि त्यसलाई कार्यान्वयन गर्ने हात इमानदार र अनवरत क्रियाशील नभए कागजको खोस्टो बन्ने बताएका छन्।
संविधान दिवस तथा राष्ट्रिय दिवसका अवसरमा शनिबार काठमाडौंको सैनिक मञ्च टुँडिखेलमा आयोजित समारोहलाई सम्बोधन गर्दै प्रधानमन्त्री शाहले संविधानको अक्षर र भावना दुवैप्रति सरकार पूर्णरूपमा प्रतिबद्ध रहेको बताए।
‘यो संविधानले नेपाली जनतासँग एउटा वाचा गरेको छ–विविधताबीचको एकता, सबै प्रकारका विभेद र असमानताको अन्त्य र विकास, समृद्धि एवम् सामाजिक न्यायका आधारमा समतामूलक समाजको निर्माण,’ उनले भने।
उनले प्रतिस्पर्धात्मक बहुदलीय लोकतन्त्र, मानव अधिकार र कानुनी राज्य नेपालको राष्ट्रिय जीवनका आधार भएको बताए। ‘यी हाम्रा लागि सर्तहरू होइनन्, यी हाम्रो राष्ट्रिय जीवनको आधार हुन्,’ उनले भने।
प्रधानमन्त्री शाहले संविधानको कार्यान्वयनसँगै भ्रष्टाचार र दण्डहीनताको अन्त्यका लागि सरकार दृढ रहेको बताए। भ्रष्टाचार र दण्डहीनताको जरो गहिरो रहेको उल्लेख गर्दै उनले त्यसविरुद्ध काम गर्ने हातहरू अब बलिया र धेरै रहेको बताए।
‘म प्रस्ट भन्छु, यो सुरुवात हो, अन्त्य होइन। भ्रष्टाचार र दण्डहीनताको जरो गहिरो छ। तर त्यो जरो उखेल्ने हातहरू अब झन् बलिया छन्, झन् धेरै छन्,’ उनले भने।
विकासका लागि सुशासन अनिवार्य पूर्वसर्त भएको उल्लेख गर्दै उनले सरकारले प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासनयन्त्रमा राजनीतिक तटस्थता र सरकारी तथा सार्वजनिक पदमा योग्यतामा आधारित नियुक्ति प्रक्रिया अवलम्बन गरेको बताए।
‘सुशासन नारा होइन, काम हो। र हामी काम गरिरहेका छौँ,’ उनले भने। संघ, प्रदेश र स्थानीय तहबीच सहकारिता, सहअस्तित्व र समन्वयका आधारमा राष्ट्र विकासको साझा उद्देश्य प्राप्त गर्न संघीय सरकार प्रतिबद्ध रहेको उनले बताए।
प्रधानमन्त्री शाहले सरकारले पुरानै बाटोमा मात्र सीमित नभई कृत्रिम बुद्धिमत्ता, डिजिटल प्रविधि र साइबर सुरक्षालाई सँगसँगै अघि बढाउने बताए।
नवप्रवर्तन र स्टार्टअपलाई अगाडि राखेर ज्ञानमा आधारित अर्थतन्त्र निर्माण गर्ने सरकारको लक्ष्य रहेको उनले बताए। डिजिटल सुशासन ब्लुप्रिन्टअनुसारको राष्ट्रिय डिजिटल पूर्वाधार त्यसको जग भएको उनको भनाइ छ। ‘युवाले सडकमा मागेको सुशासन हामी प्रविधिबाट पनि सुनिश्चित गर्छौँ,’ उनले भने।
प्रधानमन्त्री शाहले हालैको रसुवा–भोटेकोशी बाढीबाट भएको क्षति अकल्पनीय र अपूरणीय रहेको बताए।
बाढीमा परी मृत्यु भएका सबै स्वदेशी तथा विदेशी नागरिकप्रति श्रद्धाञ्जली व्यक्त गर्दै उनले शोकसन्तप्त परिवारजनमा समवेदना तथा घाइतेहरूको शीघ्र स्वास्थ्यलाभको कामना गरे।
