काठमाडौं । नेपाली कांग्रेसले २०८२ पुससम्म क्रियाशील सदस्यता नवीकरण गरेका सबै सदस्यलाई १५औँ महाधिवेशनको अधिवेशन प्रक्रियामा सहभागी गराउने भएको छ।
सभापति गगनकुमार थापाले मंगलबार अपिल जारी गर्दै पार्टीका सबै क्रियाशील सदस्यलाई अधिवेशनमा सहभागी हुन आह्वान गरेका हुन्।
पार्टीका अग्रज नेता तथा विभिन्न तहका पदाधिकारी र सदस्यबाट आएको सुझावलाई मध्यनजर गर्दै २०८२ पुससम्म नवीकरण भएका सबै क्रियाशील सदस्यलाई अधिवेशन प्रक्रियामा सहज सहभागिता गराउने निर्णय यसअघि नै गरिएको थापाले बताएका छन्।
उनका अनुसार सदस्यता व्यवस्थापन समितिले सोही निर्णयअनुसार सदस्यता नामावली टुंग्याइसकेको छ। केन्द्रीय निर्वाचन समितिले पनि अधिवेशनका प्रक्रिया अघि बढाइसकेको र निर्वाचन अधिकृतहरू जिल्लामा खटिइसकेको उनले बताएका छन्।
कांग्रेसको १५औँ महाधिवेशनअन्तर्गत असोज ३ र ४ गते वडा अधिवेशन हुँदैछ। महाधिवेशन असोज १६ देखि १९ गतेसम्म काठमाडौंमा हुने तय भएको छ।
सभापति थापाले अधिवेशन प्रक्रियामा कुनै अलमल वा द्विविधामा नपरी सहभागी हुन सम्पूर्ण क्रियाशील सदस्य, समर्थक तथा शुभेच्छुकलाई आग्रह गरेका छन्।
