काठमाडौं । वीरगञ्जस्थित नारायणी अस्पतालमा लामो समयदेखि सञ्चालनमा आउन नसकेको क्याथ ल्याब सेवा सञ्चालनमा आएको छ। उपकरण खरिद भएको करिब ६ वर्षपछि जडान सम्पन्न भएसँगै अस्पतालमै मुटुरोगसम्बन्धी विशिष्टीकृत सेवा उपलब्ध हुन थालेको हो।
अस्पतालका अनुसार २०७६ चैतमा खरिद गरिएको क्याथ ल्याब उपकरण लामो समयसम्म जडान हुन नसक्दा सेवा सञ्चालनमा आउन सकेको थिएन।
उपकरण जडान सम्पन्न भएपछि भदौ १० गतेदेखि क्याथ ल्याब औपचारिक रूपमा सञ्चालनमा आएको हो। सेवा सुरु भएसँगै मुटुसम्बन्धी विशिष्टीकृत उपचारका लागि अस्पताल आउने बिरामीले वीरगञ्जमै उपचार पाउन थालेका छन्।
क्याथ ल्याब सञ्चालनमा आएपछि मधेस प्रदेशका साथै आसपासका जिल्लाका बिरामीलाई मुटुरोगको विशिष्टीकृत उपचारका लागि काठमाडौं तथा अन्य सहर जानुपर्ने बाध्यता कम हुने अपेक्षा गरिएको छ।
अस्पतालमै क्याथ ल्याब सेवा उपलब्ध भएपछि मुटुरोगको परीक्षण तथा उपचारमा सहजता हुनुका साथै उपचार खर्च र समयसमेत घट्ने अपेक्षा गरिएको छ। स्थानीयस्तरमै यस्तो सेवा उपलब्ध हुँदा मधेस प्रदेशका सेवाग्राहीले थप लाभ पाउने अस्पतालको विश्वास छ।
