काठमाडौं। मधेश प्रदेशमा नेपाली कांग्रेस नेतृत्वको सरकारले निरन्तरता पाउने भएको छ। जनमतले समर्थन फिर्ता लिएपछि अन्य सहयात्री जसपा, नेकपा पनि बाहिरिने चर्चा बढेको थियो।
योसँगै कृष्णप्रसाद यादव नेतृत्वको सरकार संकटमा पर्न थालेको थियो।
तर, कांग्रेसबाट दल नेता यादव, जसपा दल नेता सरोजकुमार यादव, नेपाली कम्युनिष्ट पार्टी दल नेता युवराज भट्टराई र लोसपा नेपाल दल नेता जयनुल राइनले अहिलेकै सरकारलाई निरन्तरता दिने निर्णय गरेका छन्।
जनमत पार्टीभित्रको विवाद भने समाधान भएको छैन। जनमतबाट सरकारमा दुई मन्त्री छन्। पार्टीले संसदीय दल नेता परिवर्तन गरेर मन्त्रीहरूलाई फिर्ता आउन भनेको छ तर मन्त्रीहरूले अस्वीकार गरेका छन्।
यादव गत मंसिरमा मुख्यमन्त्री बनेका थिए। कांग्रेस, जसपा, जनमत, नेकपाका ७७ जना सांसदको समर्थनमा उनी मुख्यमन्त्री बनेका थिए।
