काठमाडौं। इरानका विदेशमन्त्री अब्बास अरागचीले रुसी तेल खरिदबारे अमेरिकाको नीतिमाथि कडा आलोचना गरेका छन्।
उनका अनुसार अमेरिका अहिले भारतसहित विश्वका धेरै मुलुकसँग रूसबाट तेल खरिद गर्न आग्रह गरिरहेको छ।
अब्बासको यो प्रतिक्रिया त्यतिबेला आएको हो, जब मध्यपूर्वमा बढ्दो तनावका बीच अमेरिकाले हालै अस्थायी रूपमा प्रतिबन्ध केही खुकुलो बनाएको छ, ताकि भारतजस्ता देशले समुद्रमा पहिल्यै उपलब्ध रहेको रुसी तेल खरिद गर्न सकून्।
प्रेस सेक्रेटरी कैरोलीन लेविटले गत मंगलबार आयोजित पत्रकार सम्मेलनमा अमेरिकी राष्ट्रपति डोनाल्ड ट्रम्प, अमेरिकी अर्थमन्त्री स्कट बेसेन्ट रराष्ट्रिय सुरक्षा टोलीले भारतले जिम्मेवार व्यवहार देखाएकाले यस्तो निर्णय लिएको बताएकी थिइन्। उनका अनुसार भारतले यसअघि प्रतिबन्धित रुसी तेल खरिद रोकिसकेको थियो।
इरानी विदेशमन्त्रीले सामाजिक सञ्जालमा लेखेका छन्, ‘अमेरिकाले महिनौँसम्म भारतमाथि रूसबाट तेल आयात रोक्न दबाब दिइरह्यो। तर इरानसँगको केवल दुई साताको संघर्षपछि अहिले ह्वाइट हाउसले भारतसहित विश्वका देशहरूलाई रुसी तेल किन्न अपिल गरिरहेको छ।’
इरानी विदेशमन्त्रीले युरोपेली संघ अन्तर्गतका युरोपेली मुलुकहरूको पनि आलोचना गरेका छन्। उनले युरोपले इरानविरुद्धको ‘अवैध युद्ध’लाई समर्थन गरेको र त्यसबाट रूसविरुद्ध अमेरिकाको साथ पाउने अपेक्षा राखेको आरोप लगाएका छन्।
