काठमाडौं। आज बिहीबार बिहानबाट सुरु भएको प्रतिनिधिसभा निर्वाचनमा मतदान बढ्ने आकलन गरिएको छ।
कार्यवाहक प्रमुख निर्वाचन आयुक्त रामप्रसाद भण्डारीले मतदान गर्ने मतदाताहरुको संख्या र मत प्रतिशत बढ्ने आकलन गरिएको बताए। यसपटक नियमित चुनाव नभइ गत भदौमा भएको जेनजी आन्दोलनको बलमा प्रतिनिधिसभा विघटन भएपछि हुन लागेको हो। नियमित चुनाव भने ०८४ मा हुने तालिका थिए।
यसपटक चुनावमा होली, नारी दिवस लगायत गरी एक साता लामो विदा हुनुका साथै युवामा चुनावप्रति आकर्षण बढेको देखिन्छ। जसकारण सहरबाट मतदाता नामावली भएको क्षेत्रमा उल्लेख्य मात्रामा गएका छन्।
निर्वाचन आयोगका अनुसार ०७९ को निर्वाचनमा ६१.६३ प्रतिशत मत खसेको थियो। ०७४ मा ६८.६७ प्रतिशत मत खसेका थियो। ०७० मा ७८.३४ प्रतिशत मत खसेको थियो।
यसपटक १ करोड ९० लाख मतदाता छन्। निर्वाचनमा १६५ जना प्रत्यक्ष निर्वाचित हुन्छन् भने समानुपातिकतर्फबाट ११० जना चुनिन्छन्। प्रतिनिधिसभामा २७५ जनासदस्य निर्वाचित हुनेछन्।
प्रत्यक्ष निर्वाचित हुने १६५ सिटका लागि ३ हजार ४०६ उम्मेदवार छन्। समानुपातिकतर्फबाट निर्वाचित हुने ११० सिटमा ३ हजार १३५ जना उम्मेदवार छन्।
निर्वाचनका लागि देशभर १० हजार ९६७ मतदान स्थलमा २३ हजार ११२ मतदान केन्द्र निर्धारण गरिएको छ। १४३ अस्थायी मतदानस्थल तय गरिएको छ।
