काठमाडौं । चितवनको भरतपुर महानगरपालिका–२९, सिमलतालमा डेढ वर्षअघि त्रिशूली नदीमा खसेका दुई बसमध्ये एक गणपति डिलक्स बस फेला परेको छ।
आइतबार बिहान नदी किनारामा बसको केही भाग देखिएपछि पुनः उत्खनन सुरु गरिएको थियो। तीन दिनसम्म निरन्तर गरिएको उत्खननपछि मंगलबार सशस्त्र प्रहरी बलको टोलीले उक्त बस गणपति डिलक्स भएको पुष्टि गरेको हो।
खोजी कार्यमा खटिएका सशस्त्र प्रहरीका हबल्दार ललितबहादुर काम्चेका अनुसार उत्खननका क्रममा ‘गणपति डिलक्स’ लेखिएको भाग फेला परेको हो। उनले बसका अन्य भाग निकाल्न उत्खनन कार्य अझै जारी रहेको जानकारी दिए।
२०८१ असार २८ गते बिहान काठमाडौंबाट गौर जाँदै गरेको प्रदेश ०३–००१ ख २४९५ नम्बरको गणपति यातायातको बस र वीरगञ्जबाट काठमाडौं जाँदै गरेको बागमती प्रदेश ०३–००६ ख १५१६ नम्बरको एन्जल डिलक्स बस नारायणगढदेखि करिब २२ किलोमिटर पूर्वोत्तर सिमलतालमा पहिरोमा बग्दै त्रिशूली नदीमा खसेर बेपत्ता भएका थिए।
दुर्घटनाका क्रममा दुबै बसमा सवार ६५ यात्रु नदीमा खसेका थिए, जसमध्ये गणपति यातायातको बसमा रहेका तीन यात्रु पौडेर ज्यान बचाउन सफल भएका थिए। बाँकी यात्रु बससँगै बगेका थिए। दुर्घटनापछि केही शव मात्रै फेला परेका थिए।
बस र यात्रुको खोजीका लागि नेपाली सेना, सशस्त्र प्रहरी र नेपाल प्रहरीका गोताखोर, सोनार (वाटर ड्रोन) प्रयोग गरी करिब ५ सय सुरक्षाकर्मी परिचालन गरिएको थियो। थप खोजीका लागि सरकारले भारतबाट उच्च प्रविधिसहितका गोताखोरसमेत ल्याएको थियो। तर लामो समयसम्म बस फेला पर्न सकेको थिएन।
