काठमाडौं । हमासको नियन्त्रणमा रहेका भनिएका नेपाली विपिन जोशीको मृत्यु पुष्टि भएको छ। हमासको सशस्त्र शाखा अल–कसम ब्रिगेड्सले एक विज्ञप्ति जारी गर्दै मृतक बन्दीहरूमा बिपिन जोशी पनि रहेको जनाएको हो।
विज्ञप्तिमा विपिन जोशीसहित गाय इलुज, योसी शाराबी र ड्यानियल पेरेजको शव आज (सोमबार) इजरायललाई हस्तान्तरण गरिने उल्लेख गरिएको छ। यो प्रक्रिया इजरायल र हमासबीच भएको नयाँ सम्झौताअन्तर्गत भएको बताइएको छ, जसअनुसार इजरायलले केही प्यालेस्टिनी कैदीहरूलाई रिहा गर्नेछ। हमासले यसअघि गाजामा रहेका २० जीवित बन्दीहरूलाई रिहा गरिसकेको थियो। तर, अझै पनि केही मृत इजरायली बन्दीका अवशेषहरू हमासको नियन्त्रणमा रहेको बताइएको छ।
इजरायली अधिकारीहरूले यो सम्झौताअन्तर्गत हमासले फेला परेका सबै मृतक बन्दीका शव फिर्ता गर्नुपर्ने बताएका छन्। नेपालका विपिन जोशी २०८० असोज २० गते (७ अक्टोबर २०२३) इजरायलको दक्षिणी भागस्थित किब्बुट्ज अलुमिम मा हमासको आक्रमणपछि बेपत्ता भएका थिए। उनी इजरायलमा कृषिसम्बन्धी तालिममा गएका नेपाली विद्यार्थीमध्ये एक थिए।
