काठमाडौं । बागमती प्रदेश सरकारको नेतृत्व अब नेपाली कांग्रेसका इन्द्रबहादुर बानियाँले गर्ने भएका छन्। प्रदेश प्रमुख दीपकप्रसाद देवकोटाले मंगलबार दिउँसो बानियाँलाई मुख्यमन्त्री पदमा नियुक्त गरेका हुन्।
बानियाँले नेपाली कांग्रेस र नेकपा एमालेको संयुक्त समर्थनमा सरकार गठन गरेका हुन्। दुबै दलका गरी ६४ सांसदको समर्थन बानियाँलाई प्राप्त छ। बागमती प्रदेशसभामा कुल ११० जना सांसद छन्।
साउन १४ गते कांग्रेस संसदीय दलको नेतामा २२ मतसहित विजयी भएका बानियाँलाई पार्टी सभापति शेरबहादुर देउवाको समर्थन प्राप्त छ। देउवाको निर्देशनमा तत्कालीन मुख्यमन्त्री बहादुर सिंह लामाले राजीनामा दिएपछि बानियाँलाई सरकारको नेतृत्व दिइएको हो।
बानियाँ यसअघि २०७४ सालमा संस्कृति, पर्यटन तथा नागरिक उड्डयन राज्यमन्त्री र गृह राज्यमन्त्रीको जिम्मेवारी सम्हालिसकेका छन्। उनले संविधानसभा सदस्यको रूपमा पनि काम गरिसकेका छन्।
२०४४ सालदेखि राजनीतिमा सक्रिय ५२ वर्षीय बानियाँ नेपाली कांग्रेस मकवानपुरका जिल्ला सभापति, नेपाल विद्यार्थी सङ्घ, तरुण दल, महासमिति सदस्य लगायतका भूमिका निर्वाह गर्दै आएका छन्।
