इस्लामाबाद । पाकिस्तानका पूर्वप्रधानमन्त्री इमरान खान नेतृत्वको तहरीक–ए–इन्साफ (पीटीआई) पार्टीका १०८ सदस्यलाई काराबासको सजाय सुनाइएको छ। सन् २०२३ मा सेनाविरुद्ध हिंसात्मक प्रदर्शनमा संलग्न भएको आरोपमा उनीहरूलाई सजाय सुनाइएको हो।
बीबीसीका अनुसार सजाय पाउनेहरूमध्ये पाकिस्तानको राष्ट्रिय सभामा विपक्षी दलका नेता उमर अय्युब खान समेत छन्। उनलाई आतंकवाद विरोधी अदालत (‘एन्टी टेररिज्म कोर्ट’) ले १० वर्ष कैदको सजाय सुनाएको हो।
सन् २०२३ को मे महिनामा इमरान खानलाई भ्रष्टाचारसम्बन्धी मुद्दामा अदालतमा उपस्थित गराउन लाग्दा पाकिस्तानको सुरक्षाबलले उनलाई गिरफ्तार गरेको थियो। गिरफ्तारीअघि नै देशका विभिन्न भागमा हिंस्रक विरोध प्रदर्शनहरू भइसकेका थिए। ती प्रदर्शनहरूमा संलग्न भएको आरोपमा पीटीआईका नेताहरूमाथि कारबाही गरिएको हो।
पछिल्लो फैसलाले पीटीआईका छ जना सांसदहरूलाई अयोग्य ठहर गर्दै संसद सदस्यता पनि खारेज गरेको छ। विपक्षी दलहरूले अदालतको यो निर्णयको आलोचना गरेका छन्। उनीहरूले यसलाई राजनैतिक प्रतिशोधको रूपमा लिएको आरोप लगाएका छन्।
इमरान खान हाल पनि विभिन्न मुद्दामा जेलमै रहेका छन् भने पीटीआईले हालैका दिनहरूमा सरकारविरुद्धको दबाब अभियानलाई निरन्तरता दिँदै आएको छ।
