काठमाडौं । स्वास्थ्य तथा जनसंख्यामन्त्री प्रदीप पौडेलले ‘निरोगी नेपाल’ अभियानअन्तर्गत आयुर्वेद र प्राकृतिक चिकित्सामा आधारित नागरिक आरोग्य कार्यक्रमलाई सबै स्थानीय तहमा विस्तार गरिएको बताएका छन्।
स्वास्थ्यमन्त्री बनेको एक वर्ष पूरा भएको अवसरमा मन्त्रालयमा आयोजित पत्रकार सम्मेलनमा बोल्दै मन्त्री पौडेलले योग, ध्यान र स्वस्थ जीवनशैली प्रवर्द्धनमा केन्द्रित कार्यक्रमहरूलाई स्थानीय सरकारसँगको समन्वयमा सञ्चालन गरिएको जानकारी दिए। उनले भने, “यसले नसर्ने रोगहरूको रोकथाम गर्दै नागरिकलाई सन्तुलित जीवनशैलीतर्फ अभिप्रेरित गर्छ।”
मन्त्री पौडेलका अनुसार बूढानीलकण्ठमा स्थापना गरिएको ‘राष्ट्रिय आयुर्वेद पञ्चकर्म तथा योग केन्द्र’ ले २०८१ सालको चैत २२ गतेदेखि सेवा दिइरहेको छ। केन्द्रले विशेष आयुर्वेद र योगमा आधारित पञ्चकर्म सेवा प्रदान गर्दै अध्ययन–अनुसन्धानका लागि केन्द्रबिन्दुको भूमिका खेल्नेछ।
त्यस्तै उनले जलन उपचार निःशुल्क गर्न ‘जलनको सघन उपचार सेवा विस्तार गर्ने कार्यविधि, २०८१’, क्यान्सर उपचार सेवा प्रदेशस्तरमा पुर्याउने उद्देश्यसहित ‘क्यान्सर उपचार सेवा विस्तार कार्यविधि, २०८१’ तथा डिजिटल स्वास्थ्य पूर्वाधार निर्माण गर्न ‘विद्युतीय चिकित्सा अभिलेख र दूरचिकित्सा सेवा एकीकृत कार्यविधि, २०८१’ लागू गरिएको बताए।
यसैबीच, १८ वर्ष मुनिका किशोरीहरूको डिम्बको अवैध कारोबारबारे उठेका गम्भीर आरोपका विषयमा मन्त्रालयले छानबिन समिति गठन गरेको छ। थापाथलीस्थित प्रसुतिगृहकी स्त्रीरोग विशेषज्ञ डा. ज्वाला थापाको संयोजकत्वमा गठित तीन सदस्यीय समितिमा डा. सुनिता लम्साल र कानून अधिकृत सुरेश चौलागाईँ सदस्य रहेका छन्। समितिलाई पाँच दिनभित्र प्रतिवेदन पेश गर्न निर्देशन दिइएको छ।
मन्त्रालयका प्रवक्ता डा. प्रकाश बुढाथोकीका अनुसार, “समितिले काम थालिसकेको छ। प्रतिवेदनपछि थप निर्णय गरिनेछ।”
यसअघि प्रहरीले होप फर्टिलिटी एण्ड डायग्नोस्टिक प्रालि र एन्जल फर्टिलिटी क्लिनिकमा छापा मारी पाँच जना पक्राउ गर्दै डिम्ब कारोबारसम्बन्धी अनुसन्धान अघि बढाएको थियो।
