काठमाडौं । नेकपा एमालेका अध्यक्ष तथा प्रधानमन्त्री केपी शर्मा ओली र पूर्वराष्ट्रपति विद्यादेवी भण्डारीबीच शनिबार डेढ घण्टा लामो भेटवार्ता सम्पन्न भएको छ। अपराह्न ४ बजे सुरु भएको भेट च्यासलस्थित एमाले केन्द्रीय कार्यालयमा भएको हो।
भेटपछि पत्रकारहरूको जिज्ञासामा पूर्वराष्ट्रपति भण्डारीले आफूले एमालेको सदस्यता नवीकरण गरिसकेको जानकारी दिँदै “यो त पुरानो विषय हो” भन्ने टिप्पणी गरिन्।
तर उनले आजको छलफलमा सदस्यता नवीकरणको विषय उठान नै नभएको बताइन्।
पत्रकारले “त्यसो भए छलफलमा के विषयमा कुरा भयो त?” भनेर सोध्दा पूर्वराष्ट्रपति भण्डारीले छोटो जवाफ दिइन्, “आज राष्ट्रिय राजनीतिको विषयमा कुराकानी भयो।”
भेटवार्ताबारे थप विवरण सार्वजनिक गरिएको छैन। तर, पछिल्लो समय एमालेको आन्तरिक कसरत र आगामी राजनीतिक समीकरणका सन्दर्भमा यो भेटलाई महत्वका साथ हेरिएको छ।
भेटवार्ता सकिएपछि ओली र भण्डारी सौहार्दपूर्ण मुद्रामा देखिएका थिए। कार्यालयबाट बाहिरिने क्रममा दुवै नेताको अनुहारमा खुसी देखिएको थियो। एमालेभित्र पूर्वराष्ट्रपति भण्डारीको भूमिकाबारे पछिल्लो समय उठिरहेको चासोका बीच भएको यो भेटलाई राजनीतिक रूपमा सन्देशमूलक मानिएको छ।
