भारतीय नर्स निमिषा प्रियाको मृत्युदण्ड यमनले स्थगित गर्‍यो

एजेन्सी । यमन सरकारले भारतीय नर्स निमिषा प्रियालाई सुनाइएको मृत्युदण्ड हाललाई स्थगन गरेको छ। उनीमाथि आफ्ना व्यापारिक साझेदार तलाल अब्दो महदीको हत्या अभियोगमा फाँसीको सजाय तोकिएको थियो। उनलाई जुलाई १६ मा मृत्युदण्ड दिन लागिएको थियो।

यो निर्णय केरलाका प्रभावशाली सुन्नी मुस्लिम धर्मगुरु कन्थापुरम ए.पी. अबुबकर मुसलियार तथा विभिन्न मानव अधिकारकर्मी र एक्टिभिष्ट समूहहरूको पहलपछि आएको बताइएको छ। साथै, भारत सरकारको निरन्तर कूटनीतिक प्रयासपश्चात यमनका स्थानीय अधिकारीहरूले सजाय स्थगन गर्ने निर्णय गरेका हुन्।

भारतीय अधिकारीहरू यमनको जेल प्रशासन, अभियोजन पक्षसँग निरन्तर सम्पर्कमा रहेका थिए भने निमिषाको परिवार र पीडित पक्षबीच आपसी सहमतिका लागि थप समय दिन आग्रह गरिएको थियो।

निमिषा प्रियालाई यमनमा सन् २०१७ देखि हिरासतमा राखिएको थियो। उनीमाथि यमनी नागरिक तलाल अब्दो महदीलाई लागूऔषधको ओभरडोज दिएर हत्या गरेको आरोप छ।

दुवै जना यमनको एक निजी क्लिनिकमा साझेदार थिए। तर, तलालले निमिषाको राहदानी आफ्नो नियन्त्रणमा राखी मानसिक र शारीरिक रूपमा दुर्व्यवहार गर्ने गरेको आरोप पनि उठाइएको छ। यही पृष्ठभूमिमा हत्या भएको भनिएको हो। भारतले यस मुद्दालाई संवेदनशील रुपमा लिँदै यमनसँग कूटनीतिक समन्वय गर्दै आएको थियो। हाल मृत्युदण्ड स्थगित भएपछि निमिषा प्रियाको जीवन रक्षा हुने सम्भावनामा नयाँ आशा देखिएको छ।