काठमाडौं । प्रधानमन्त्री केपी शर्मा ओलीले नेपाललाई विश्वकै सबैभन्दा पुरानो चिकित्सा अभ्यासको स्थल भएको दाबी गरेका छन्। सोमबार त्रिवि शिक्षण अस्पतालमा विस्तारित सेवा भवन उद्घाटन समारोहलाई सम्बोधन गर्दै ओलीले नेपालमा तीन हजार वर्ष अगाडि नै शल्यक्रियाको अभ्यास सुरु भइसकेको बताए।
प्रधानमन्त्री ओलीका अनुसार एलोपेथिक चिकित्सा विज्ञानका प्रवर्तक मानिने हिप्पोक्रेटसभन्दा धेरै अघिदेखि नेपालमा चिकित्सा ज्ञान र अभ्यास मौलाएको थियो। “तीन हजार वर्षभन्दा अगाडि चतरामा विश्वामित्रका छोरा ऋषि सुश्रुतले सर्जरी सिकेका थिए, सर्जरी गरेका थिए,” ओलीले भने, “उनले साथीको औंलो काटिएपछि जोडेका थिए, जुन शल्यक्रियाको दृष्टान्त हो।”
ओलीले जनसंख्या कम भएका कारण ऋषि सुश्रुत भारतको बनारस गएर शल्यक्रिया अभ्यास अगाडि बढाएको जिकिर गरे। साथै उनले चरकलाई आयुर्वेद र चिकित्साशास्त्रका जनकका रूपमा व्याख्या गर्दै पाणिनी र जनक ऋषिको समेत नेपालको भूगोलसँग सम्बन्ध जोडिएर आएका ऐतिहासिक पात्र भएको बताए।
प्रधानमन्त्री ओलीले त्रेतायुगको प्रसंग उल्लेख गर्दै भने, “लक्ष्मण बेहोस हुँदा हनुमानले हिमालयबाट जडिबुटी ल्याएका थिए, त्यो पनि हाम्रो स्वास्थ्य विज्ञानको इतिहासको प्रमाण हो।”
उनले चिकित्सा विज्ञानको सुरुवात ऋषिमुनिबाट भएको र त्यो बेला प्रोफेसरलाई नै ऋषिमुनि भनिन्थ्यो भन्ने उल्लेख गरे। “हामी अहिले पछाडि परे पनि चिकित्सा ज्ञान र अभ्यासको उद्गम स्थल यहीँ हो,” उनले भने।
कार्यक्रममा प्रधानमन्त्री ओलीले भाटभटेनी सुपर मार्केटको सहयोगमा निर्माण भएको विस्तारित सेवा भवनको उद्घाटन गरे। यो भवन त्रिवि शिक्षण अस्पतालको ४३ औं वार्षिकोत्सवको अवसरमा उद्घाटन गरिएको हो।
प्रधानमन्त्री ओलीले निरोगी नेपाल अभियान अन्तर्गत स्वास्थ्य सेवा गुणस्तरीय, सुलभ र प्रभावकारी बनाउन आहार, बिहार र आराममा ध्यान दिनुपर्ने बताए। साथै, सामाजिक उत्तरदायित्व वहन गर्दै स्वास्थ्य क्षेत्रमा सहयोग पु¥याउने मीनबहादुर गुरुङ र साबित्री गुरुङको प्रशंसा गरे।
