मधेश प्रदेशमा विशिष्ट मिर्गौला उपचार केन्द्र स्थापना गरिने : स्वास्थ्यमन्त्री

काठमाडौं । स्वास्थ्य तथा जनसंख्या मन्त्री प्रदीप पौडेलले मधेश प्रदेशमा विशिष्ट सेवासहितको मिर्गौला उपचार केन्द्र स्थापना गरिने घोषणा गरेका छन्।

आइतबार वीरगञ्जस्थित नारायणी अस्पतालमा स्तन क्यान्सर जाँचका लागि म्यामोग्राम उपकरण र निःसन्तान दम्पतीका लागि इन्ट्रायुटेराइन इनसेमिनेसन सेवा सुरु गर्ने कार्यक्रममा सहभागी हुँदै मन्त्री पौडेलले मिर्गौला रोगीको उपचारका लागि प्रदेशस्तरीय विशेष केन्द्र आवश्यक भएको बताए।

‘मधेश प्रदेशमा मिर्गौला रोगीको संख्या अत्यधिक रहेको छ। खासगरी वैदेशिक रोजगारीबाट फर्किएका नेपालीमा यो समस्या धेरै देखिएको छ,’ उनले भने, ‘त्यसैले आगामी आर्थिक वर्षको बजेटमा मधेसमा मिर्गौला उपचार केन्द्र स्थापनाका लागि बजेट व्यवस्था गरिएको छ।’

उनका अनुसार हाल देशभर १३ हजारभन्दा बढी मिर्गौला रोगी डायलाइसिस सेवामा रहेका छन्। तीमध्ये करिब चार हजारभन्दा बढी मधेस प्रदेशमा छन्। यसै कारण उक्त प्रदेशमा नै विशेषज्ञ सेवासहितको केन्द्र आवश्यक भएको मन्त्री पौडेलले स्पष्ट पारे।

यद्यपि केन्द्र कहाँ स्थापना गरिने भन्ने विषयमा अझै टुंगो लाग्न बाँकी रहेको उनले बताए। ‘रौतहट, सप्तरी वा अन्य कुनै जिल्ला हुन सक्छ। गृहकार्य भइरहेको छ,’ पौडेलले भने।

कार्यक्रममा नारायणी अस्पतालमा छिट्टै क्याथल्याब (Cath Lab) स्थापना गर्नुपर्ने आवश्यकता पनि उनले औँल्याए। अस्पतालको सुधारका लागि राजनीतिक दल, समाजसेवी, जनप्रतिनिधि तथा सबै सरोकारवालाको सहकार्य जरुरी रहेको मन्त्रीको भनाइ थियो।

अस्पतालका मेडिकल सुपरीटेन्डेन्ट डा.चुमनलाल दासले हालै सुरु गरिएका म्यामोग्राम सेवा र IUI युनिटले विशेष उपचार सुविधामा नयाँ आयाम थप्ने विश्वास व्यक्त गरे। ‘आजदेखि निःसन्तान दम्पतीका लागि IUI सेवा निःशुल्क रूपमा सुरु गरिएको छ,’ उनले भने, ‘यसले धेरैलाई राहत दिने अपेक्षा गरिएको छ।’