काठमाडौं । क्यान्सरको उपचारमा प्रयोग हुने अत्यावश्यक औषधि तथा स्वास्थ्य सामग्रीहरू स्वास्थ्य तथा जनसंख्या मन्त्रालयलाई औपचारिक रूपमा आइतबार हस्तान्तरण गरिएको छ।
अमेरिकास्थित अन्तर्राष्ट्रिय गैरसरकारी संस्था ‘डाइरेक्ट रिलिफ’ को सहयोग र ‘वान हार्ट वर्ल्डवाइड’ को समन्वयमा नेपाल ल्याइएका यी औषधिहरू असार २७ गते नेपाल आइपुगेका थिए। स्वास्थ्य सेवा विभाग अन्तर्गतको व्यवस्थापन महाशाखामा भण्डारण गरिएको यी सामग्रीहरू आइतबार एक कार्यक्रममार्फत मन्त्रालयलाई हस्तान्तरण गरिएको हो।
यससँगै आजै ती औषधि तथा सामग्रीहरू बिपी कोइराला मेमोरियल क्यान्सर अस्पताल (भरतपुर), भक्तपुर क्यान्सर अस्पताल (भक्तपुर), सुशील कोइराला प्रखर क्यान्सर अस्पताल (बाँके) र वीर अस्पताल (काठमाडौँ) लाई प्रदान गरिएको छ।
स्तन क्यान्सर, प्लाक सोरियासिस, अल्जाइमर लगायतका रोगहरूको उपचारमा प्रयोग हुने ती औषधिहरू अब ती अस्पतालहरूमा क्यान्सरका बिरामीहरूलाई निःशुल्क रूपमा उपलब्ध गराइनेछ।
स्वास्थ्य मन्त्रालयले विज्ञप्ति जारी गर्दै भविष्यमा पनि यस्ता सहयोग कार्यक्रमलाई निरन्तरता दिने प्रतिबद्धता जनाएको छ। मन्त्रालयले अन्तर्राष्ट्रिय साझेदार र स्थानीय संस्थाहरूसँग समन्वय गर्दै औषधिको पहुँचलाई थप सुलभ बनाउने प्रयास जारी रहेको उल्लेख गरेको छ।
