काठमाडौं । राष्ट्रिय स्वतन्त्र पार्टी (रास्वपा) की सांसद सुमना श्रेष्ठले निजी विद्यालयहरूलाई नयाँ मापदण्डअनुसार अगाडि बढाउनुपर्ने सुझाव दिएकी छन्। १५ वर्षभित्र निजी विद्यालयहरूलाई गैरनाफामूलक र लोककल्याणकारी बनाउने नीति लिइनुपर्ने उनको धारणा छ।
प्रतिनिधि सभा अन्तर्गतको शिक्षा, विज्ञान तथा प्रविधि समितिको बिहीबारको बैठकमा बोल्दै सांसद श्रेष्ठले भनिन्, “जुत्ता बेचेजस्तो मुनाफा गर्न हुँदैन। संविधानको स्प्रिट नबोक्ने हो भने संविधान नै चेन्ज गरौँ।”
उनले शिक्षालाई व्यापारको रूपमा लिन नहुनेमा जोड दिँदै भनिन्, “शिक्षा प्रणाली गैरनाफामूलक बन्नुपर्छ। निजी विद्यालय खोल्ने अनुमति दिने कि नदिने भन्ने प्रश्नसँगै अहिले सञ्चालनमा रहेका संस्थालाई नयाँ मापदण्डअनुसार सुधार गर्नुपर्छ।”
श्रेष्ठले निजी विद्यालयहरूलाई तत्काल बन्द गर्नु उपयुक्त नहुने बताउँदै एक निश्चित समयसीमा तोकेर क्रमशः सुधारको बाटोमा लैजानुपर्ने प्रस्ताव राखेकी छन्। उनका अनुसार, “१५ वर्षमा निजी विद्यालयलाई राष्ट्रियकरण होइन, तर गैरनाफामूलक लोककल्याणकारी संस्था बनाउने लक्ष्य राखेर अघि बढ्नुपर्छ।”
उनको यो प्रस्तावले शिक्षा क्षेत्रको सुधार र दीर्घकालीन रूपान्तरणको बहसलाई नयाँ ढंगले अघि बढाउने संकेत देखिएको छ।
