इजरायली बन्धक बर्जरलाई रेडक्रसको जिम्मा

एजेन्सी । प्यालेस्टिनी लडाकु समूह (हमास)ले इजरायली महिला बन्धक अगम बर्जरलाई सुपुर्दगी गरेको छ। गाजा युद्ध अन्त्य गर्ने उद्देश्यले भएको युद्धविराम सम्झौताअन्तर्गत तीन इजरायली र पाँच थाई बन्दीलाई बिहीबार रिहा गर्ने योजनाअनुसार नै उनलाई रिहा गरिएको हो। अन्य दुई इजरायली र पाँच थाई बन्धकलाई पनि आजै रिहा गरिने बताइने छ।

उत्तरी गाजा पट्टीको जबालियाको एक मञ्चमा हमास लडाकुहरूले परेड गरेपछि सैन्य पोशाकमा सजिएका बर्जरलाई रेडक्रसको अन्तर्राष्ट्रिय समितिलाई हस्तान्तरण गरिएको थियो। इजरायली सेनाले बर्जर इजरायल फर्किएको र उनको ‘प्रारम्भिक स्वास्थ्य परीक्षण’ पछि परिवारको जिम्मा लगाइने बताएको छ। यसअघि प्रधानमन्त्री बेन्जामिन नेतन्याहुको कार्यालयले बिहीबार रिहा हुने तीन जना इजरायलीहरू आर्बेल येहुद, बर्जर र गादी मोसेस रहेको जनाएको थियो।