काठमाडौं । नेकपा एमाले निकट अखिल नेपाल महिला संघअन्तर्गत केन्द्रीय युवा कमिटीले आज राष्ट्रिय युवा महिला भेला गर्दैछ ।
पत्रकार भेटघाट कार्यक्रम गरी अमेनसंघले च्यासलस्थित नेकपा (एमाले) को केन्द्रीय पार्टी कार्यालयमा बिहान १० बजे राष्ट्रिय युवा भेला गर्न लागेको जनाएको छ । पार्टी अध्यक्ष तथा प्रधानमन्त्री केपी शर्मा ओलीले भेलाको उद्घाटन गर्ने केन्द्रीय युवा कमिटी अध्यक्ष बिन्दु अधिकारीले बताइन् ।
युवा उमेर व्यक्तित्व निर्माणदेखि राष्ट्र निर्माणमा निकै महत्वपूर्ण भएकाले उत्पादन, उद्यमशीलता र रोजगारीमा लगाउनुपर्ने उनको भनाइ छ ।
अध्यक्ष अधिकारीले भनिन्‘युवा उमेर समूहका विभिन्न खालका चुनौतीहरू समय व्यवस्थापनदेखि, आफ्नो करियर विकासदेखि सामाजिक, राजनीतिक कुराहरू र आफूलाई त्यसमा नेतृत्वदायी भूमिकामा ल्याउनका लागि उहाँहरूको समय व्यवस्थापन गर्न कठिन र चुनौतीपूर्ण भएता पनि उहाँहरूलाई उत्साहित गर्न सङ्गठनमा लाग्नका लागि प्रेरित गरिरहेको छ ।’
भेलामा उत्पादन, उद्यमशीलता र रोजगारीमा युवा महिलाहरूको अवस्था र सम्भावना, युवा महिलाको नेतृत्व, सशक्तीकरणका अभ्यास र भावी रणनीति, प्रगतिशील संस्कृति, सामाजिक रूपान्तरण र युवा महिला, राजनीतिक दल तथा अन्य सङ्गठनमा युवा महिला नेतृत्व र लैङ्गिक समानताका सवालमा व्यापक छलफल हुने बताइएको छ ।
युवा महिला केन्द्रित राज्यका नीति, कार्यक्रम र प्रभावकारिता, जलवायु परिवर्तन, आप्रवासन र युवा महिलामा अर्थतन्त्रले पारेको प्रभाव, अनुकूलनको अभ्यास र प्रविधिको विकासले महिलामा पारेको प्रभाव, सम्भावना र चुनौतीको विषयमा विस्तृत छलफल हुने छ ।
सात प्रदेश र ७७ जिल्ला कमिटीबाट तीन–तीन जना गरी ४० वर्षमुनिका करिब पाँच सय युवा महिलाको सम्मेलनमा सहभागिता रहने छ । भेला युवा महिलाको आवश्यकताः आकाङ्क्षा र आवाजलाई राज्य र राजनीतिक दलका नीति, संरचना र कार्यक्रममा पुर्याउने अभियानको सुरुआत भएको महिला नेतृहरुको भनाइ छ ।
सातौँ राष्ट्रिय सम्मेलनमार्फत नेतृत्वमा युवाको महभागिता बढाउने उद्देश्यले कमिटीमा युवा महिलाका लागि ३० प्रतिशत स्थान सुरक्षित गर्ने नीति अनेमसंघले पारित गरेको छ ।
सम्मेलनपश्चात् केन्द्रीय युवा कमिटी गठन गरी प्रदेश, जिल्ला तथा पालिका स्तरमा युवा कमिटी निमाण गर्ने योजना बनाइएको छ । सघको पहिलो राष्ट्रिय भेला भने २०८९ सालमा सम्पन्न भएको थियो ।
