७० वर्षे उमेर हद हटाउने प्रस्ताव विधान महाधिवेशनमा लैजाने एमाले महासचिव पोखरेलको घोषणा

काठमाडौं । नेकपा एमालेका महासचिव शंकर पोखरेलले पार्टीको आगामी विधान महाधिवेशनमा ७० वर्षे उमेर हद हटाउने प्रस्ताव लैजाने घोषणा गरेका छन्।

आइतबार ललितपुरको च्यासलस्थित केन्द्रीय कार्यालयमा आयोजित एमाले केन्द्रीय विभागहरूको भेलालाई सम्बोधन गर्दै महासचिव पोखरेलले उक्त प्रस्ताव पार्टीको केन्द्रीय कमिटी बैठकबाट स्थगित गरिएकै कारण अब विधान महाधिवेशनबाट अनुमोदन गराउनु केन्द्रीय कमिटीको दायित्व र कर्तव्य भएको स्पष्ट पारे।

एमालेको विधान महाधिवेशन आगामी भदौ २०–२२ गते ललितपुरको गोदावारीस्थित सनराइज अन्तरराष्ट्रिय सम्मेलन केन्द्रमा हुँदैछ। महासचिव पोखरेलले २०७८ मंसिर १० गते चितवनको सौराहामा बसेको केन्द्रीय कमिटी बैठकमा तत्कालीन उपमहासचिव विष्णुप्रसाद पौडेलले विधान संशोधनको प्रस्ताव ल्याएको उल्लेख गर्दै अहिले त्यस विषयलाई लिएर विवाद र भ्रम सिर्जना गर्ने प्रयास भइरहेको बताएका छन्।

उनले अध्यक्ष पदमा दुई कार्यकालको सिमिती हटाइएपछि पुष्प कँडेललाई लेखा आयोगको अध्यक्ष तेस्रो पटक बनाइएको पनि उदाहरणस्वरूप प्रस्तुत गरे। महासचिव पोखरेलले एमाले र कांग्रेस मिलेर संसद्मा कानुनी तथा संरचनागत सुधार भएका उदाहरण दिँदै, अहिले एमालेमाथि भइरहेका आलोचना सुनियोजित र प्रयोजित रहेको टिप्पणी गरे।

उनले देशका हरेक आर्थिक सूचकहरू सुधारोन्मुख अवस्थामा रहेको दाबी गरे। कार्यक्रममा एमालेका २३ वटै विभागका इञ्चार्ज तथा प्रमुखहरूको सहभागिता रहेको थियो।