रुपन्देही । जिल्ला समन्वय समिति रुपन्देहीका प्रमुख उमाकान्त चपाईले स्थानीय तहले गर्नुपर्ने काम सम्बन्धी कार्यविधि नबन्दा काम गर्न असहज हुने गरेको बताएका छन् ।
स्थानीय तहका उद्योग शाखामा काम गर्ने कर्मचारी तथा अन्य सरोकारवाला निकायहरुबीच सेवा प्रवाह सबलीकरण सम्बन्धी अन्तरक्रिया कार्यक्रम बोल्दै प्रमुख अतिथि चपाईले सो कुरा बताएका हुन् ।
उनले स्थानीय पालिकाले उद्योग दर्ता गर्दा गर्ने व्यवसायीलाई प्रोत्साहन गर्नुपर्ने बताए । त्यस्तै स्थानीय प्रदेश र संघको कर तिर्न ठाउँका कारण समस्या हुने गरेको भन्दै एकीकृत कर लागु गर्नुपर्नेमा उनले जोड दिए ।
कार्यक्रममा उद्योग वाणिज्य तथा उपभोक्ता हित संरक्षण निर्देशनालय, भैरहवा निर्देशक कृष्ण प्रसाद गौतमले प्रदेश स्थानीय र संघको नीति फरक रहेको भएपनि सहजीकरणबाट समस्या समाधानतर्फ लाग्नुपर्ने बताए ।
तीनै तहका सरकारका नीति नियम फरक–फरक रहेको र स्थानीय तहमा काम गर्न अलमल परेको त्यसलाई सहजीकरण गर्ने उद्देश्यका साथ घरेलु तथा साना उद्योग कार्यालय रुपन्देहीले उक्त कार्यक्रम आयोजना गरेको हो ।
कार्यक्रममा घरेलु तथा साना उद्योग कार्यलयका प्रमुख शारदा भटराई, मायादेवी गाउँपालिका प्रमुख प्रशासकीय अधिकृत लेखनाथ पोखरेल र उद्योग वाणिज्य तथा उपभोक्ता हित संरक्षण निर्देशनालय, भैरहवाका शाखा अधिकृत नारायण न्यौपानेले तीनवटा कार्यपत्र प्रस्तुत गरेका थिए ।
कार्यालयका बरिष्ठ उद्योग अधिकृत लोककुमार कार्की, वरिष्ठ उद्योग अधिकृत मोहन परियारले सहभागीबाट उठेको सवालहरूको समाधान गरेका थिए ।
अन्तरक्रियामा विभिन्न स्थानीय तहका उद्योग शाखामा कार्यरत कर्मचारी, सम्बन्धित कार्यालयका प्रमुखहरुले आफ्नो धारणा राखेका थिए । कार्यक्रमको स्वागत वरिष्ठ उद्योग अधिकृत लोककुमार कार्की र सञ्चालन उद्यम विकास सहजकर्ता अनन्त पन्थीले गरेका थिए ।
