काठमाडौं । जेनजी आन्दोलनका क्रममा सिंहदरबारमा आगजनी हुँदा काठमाडौँ महानगरपालिकाले दमकल नपठाएको भन्ने समाचारप्रति महानगर प्रहरीले आपत्ति जनाएको छ।
महानगर प्रहरी प्रमुख राजुनाथ पाण्डेले बिहीबार बिहान पत्रकार सम्मेलन गरी आफूहरूले आगो निभाउन सक्दो प्रयास गरेको दाबी गरे। “महानगरपालिकाले दमकल परिचालन गरेन भन्ने कुरा गलत हो,” पाण्डेले भने।
उनका अनुसार आगो लाग्नेबित्तिकै दमकल पठाउन सक्ने सुरक्षित परिस्थिति नभएकाले केही ढिलाइ भएको हो। “दमकल जान सक्ने अवस्थामा, सुरक्षित भएर जान सक्ने अवस्थामा हामीले ढिलाइ गरेका छैनौँ,” उनले स्पष्ट पारे।
पाण्डेले पाँचवटा दमकल सिंहदरबारतर्फ पठाइएको उल्लेख गर्दै प्राथमिकतामा सिंहदरबार, अदालत र साझा सम्पत्ति रहेको जानकारी दिए। उनले बालाजु, स्वयम्भू लगायत स्थानबाट पानी ट्यांकर ल्याई तत्काल आपूर्ति गर्ने व्यवस्था मिलाइएको समेत बताए।
उनले थपे, “आगो निभाउने क्रममा सयौँ पानी ट्यांकरहरू सहयोगका रूपमा प्रयोग गरिएका थिए।” पाण्डेले आन्दोलन भड्किएको दिन भदौ २४ गते साँझ सवा ८ बजेदेखि २६ गते बिहानसम्म निरन्तर खटिएको दाबी गर्दै विभिन्न अस्पतालमा रगत अभाव भएको बेला सिभिल, मोडेल, वीर, ट्रमा सेन्टर र टिचिङ अस्पतालमा प्रहरी पठाएर सहयोगसमेत गरेको जानकारी दिए।
