काठमाडौं — सरकारले सहसचिव पद्मकुमार मैनालीलाई सचिवमा बढुवा गर्दै पूर्वाधार विकास मन्त्रालयमा पदस्थापन गरेको छ।
सोमबार बसेको मन्त्रिपरिषद् बैठकले नेपाल इन्जिनियरिङ सेवा, समूहीकरणतर्फको सचिव पदमा मैनालीलाई बढुवा गर्ने निर्णय गरेको हो।
सरकारका प्रवक्ता सस्मित पोखरेलका अनुसार बढुवा भएका मैनालीलाई पूर्वाधार विकास मन्त्रालयको सचिवको जिम्मेवारी दिने निर्णय भएको छ।
पूर्वाधार विकास मन्त्रालयको सचिव पद असोज १३ गतेदेखि रिक्त थियो। तत्कालीन सचिव गोपालप्रसाद सिग्देल अनिवार्य अवकाशमा गएपछि उक्त पद रिक्त भएको थियो।
मन्त्रालयको रिक्त सचिव पदमा मैनालीलाई पदस्थापन गरिएको हो।
मैनाली यसअघि पनि पूर्वाधार विकास मन्त्रालयमै सहसचिवका रूपमा कार्यरत थिए। उनले मन्त्रालयको सहरी विकास तथा फोहोरमैला व्यवस्थापन महाशाखाको जिम्मेवारी सम्हाल्दै आएका थिए।
मन्त्रालयमै सहसचिवका रूपमा काम गरिरहेका मैनालीलाई सचिवमा बढुवा गरी सोही मन्त्रालयको नेतृत्व दिइएको हो।
