काठमाडौं । काठमाडौंबाट गौर जाँदै गरेको रात्रिबस चितवनको भरतपुर महानगरपालिका–२९ सिमलतालबाट त्रिशूलीमा खसेको गणपति डिलक्सबाट ३ जना यात्रु हाम फालेका मध्ये एकजना डिस्चार्ज भएका छन् । जिल्ला प्रहरी कार्यालय चितवनका डीएसपी भेषराज रिजालका अनुसार दुर्घटनामा घाइते भएका उनिहरु मध्येका सुरज गुप्ता अस्पतालबाट डिस्चार्ज भएका हुन् ।
काठमाडौँबाट गौर जाँदै गर्दा बागमती प्रदेश–०३–००१ ख २४९५ नम्बरको बस त्रिशूलीमा खसेपछि हाम फालेर नदीबाट बाहिर आएको उनीहरूले प्रहरीलाई बताएका छन् ।
हाम फालेर त्रिशूलीबाट निस्कनेमा रौतहटको देवाही गोनाही नगरपालिका–१ घर भएका ३० वर्षीय नन्द दास, राजदेवी नगरपालिका–९ घर भएका ४५ वर्षीय जोगेश्वर राय यादव र गण्डमाई नगरपलिका–३ घर भएका २६ वर्षीय सुरज गुप्ता छन् ।
नन्द दास र जोगेश्वर राय यादवको चितवन स्थित नयाँ मेडिकल कलेजमा उपचार भइरहेको छ ।
शुक्रबार बिहान साढे ३ बजेतिर वीरगञ्जबाट काठमाडौंतर्फ आइरहेको बागमती प्रदेश १५१६ नम्बरको एन्जल डिलक्स बस र काठमाडौंबाट गौरतर्फ जाँदै गरेको गणपति डिलक्स बस भरतपुर महानगरपालिका २९ स्थित सिमलताल भन्ने ठाउँमा माथिबाट खसेको पहिरोमा पुरिएको हो ।
घटनापछि यात्रुहरुको खोजी भइरहेको छ । बसलाई पहिरोले बगाउने क्रममा तीन यात्रु भने भागेर बाँच्न सफल भएको प्रहरीले जानकारी दिएको छ । पहिरोमा पुरिएका दुबै बसमा जम्मा ६३ यात्रुहरु रहेको बताइएको छ । तर सबैको नाम भने पहिचान भइसकेको छैन ।
गणपति डिलक्स बसका केही यात्रुहरुको नाम भने खुलेको छ । काठमाडौंस्थित नयाँ बसपार्कले सार्वजनिक गरेको टिकट लिस्ट अनुसार राज पटेल, प्रिन्स जैशवाल, नन्दन दास र ओकिल खाँको नाम खुलेको छ । टिकट लिस्टमा अन्य यात्रुको पनि नाम उल्लेख गरिएको छ । तर उनीहरुको थर र अन्य पहिचान भने भएको छैन । नन्दु, अमिता, हरिचन्द्र, शम्भु, नवीन, ओम, राजकिशोर, शैलेन्द्र लगायतको नाम लिस्टमा देखिन्छ । उनीहरुको नामबाट टिकट बुक गरेको सार्वजनिक भएको छ।
सिमतालमा पुरिएका दुबै बस लेदोसहितको पहिरोले बगाउँदा त्रिशुली नदीमा यात्रुलाई बगाएको वा पुरेको हुनसक्ने देखिएको छ । अहिले पनि गोताखोरसहितको प्रहरी टोलीले यात्रुहरुको खोजी गरिरहेको छ । सिमतालमै पहिरो खस्दा ढुंगाले लागेर अर्को एउटा बसका चालकको मृत्यु भएको छ । उक्त बसका यात्रुहरु भने सुरक्षित रहेका छन् ।
