न्युयोर्क । भेनेजुएलाका राष्ट्रपति निकोलस मदुरोले अमेरिकी संघीय अदालतमा पहिलोपटक उपस्थित हुँदा आफूलाई ‘युद्धबन्दी’ र ‘अपहरण गरिएको’ व्यक्ति भएको दाबी गरेका छन्। न्युयोर्क सिटीको संघीय अदालतमा सोमबार करिब ४० मिनेट चलेको सुनुवाइका क्रममा मदुरो र उनकी पत्नी सिलिया फ्लोरेसले लागुऔषध तथा हतियारसम्बन्धी सबै आरोप अस्वीकार गर्दै आफू निर्दोष रहेको बताएका हुन्।
अदालत प्रवेश गर्नुअघि मदुरोका खुट्टामा लगाइएका सिक्रीको आवाज सुनिएको थियो। न्यायाधीश एल्भिन हेलरस्टाइनले पहिचान पुष्टि गर्न आग्रह गरेपछि मदुरोले आफू जनवरी ३ देखि अपहरणमा परेको र भेनेजुएलाको कराकासस्थित घरबाट पक्राउ गरिएको दाबी गरे। न्यायाधीशले भने उक्त विषयमा बोल्ने समय पछि आउने स्पष्ट पारे।
६३ वर्षीय मदुरो र उनकी पत्नीलाई शनिबार अमेरिकी सेनाले भेनेजुएलास्थित निवासबाट पक्राउ गरी न्युयोर्क ल्याएको बताइएको छ। सुनुवाइका क्रममा उनीहरू जेलको पोशाकमा देखिएका थिए र स्पेनी अनुवाद सुन्न हेडफोन प्रयोग गरेका थिए। मदुरो सुनुवाइभरि शान्त देखिए पनि अन्त्यतिर एक दर्शकले चिच्याएपछि उनले आफू ‘राष्ट्रपति र युद्धबन्दी’ भएको प्रतिक्रिया दिएका थिए।
अमेरिकाले मदुरोमाथि नर्को आतङ्कवाद, कोकिन आयातको षड्यन्त्र, मेसिनगन तथा विस्फोटक उपकरण राखेको लगायत गम्भीर आरोप लगाएको छ। उनकी पत्नी, छोरा र अन्य केही व्यक्तिसमेत मुद्दामा जोडिएका छन्। धरौटी माग नगरिएकाले दुवै संघीय हिरासतमा रहने अदालतले जनाएको छ।
यस मुद्दाको अर्को सुनुवाइ आगामी १७ मार्चका लागि तोकिएको छ।
