काठमाडौं । पूर्वप्रधानमन्त्री तथा एकीकृत समाजवादीका अध्यक्ष माधवकुमार नेपालले जेनजी आन्दोलन उग्रिनुमा तत्कालीन सत्ताधारीहरूको दम्भ र अहंकार जिम्मेवार रहेको आरोप लगाएका छन्।
बुधबार विज्ञप्ति जारी गर्दै उनले आफ्नो पार्टीले आन्दोलन पूर्व नै जेनजी युवाहरूका मागलाई समर्थन तथा ऐक्यबद्धता प्रकट गरेको स्मरण गराउँदै भनेका छन्, “उक्त जायज मागहरूलाई समयमा सम्बोधन गर्नुको सट्टा तत्कालीन सत्ताधारीहरूले देखाएको दम्भ र अहंकारकै कारण दर्जनौँ होनहार युवाले शहादत प्राप्त गर्नुपर्यो भने मुलुकले अकल्पनीय तथा अपूरणीय क्षति व्यहोर्नुपर्यो।”
उनका अनुसार लोकतान्त्रिक गणतन्त्र प्राप्त भएपछि पनि जनताको चाहना अनुसार पारदर्शी र जनउत्तरदायी शासन प्रणाली कायम गर्न नसक्दा युवाहरू निराश बने र त्यसकै परिणामस्वरूप आन्दोलन भड्किएको हो।
नेपालले भ्रष्टाचार, कुशासन, बेरोजगारी, युवा पलायन, नेताहरूको जीवनशैली र जनताबीचको अन्तरलाई समेत आन्दोलनको मूल कारण रहेको बताए।
विज्ञप्तिमा भनिएको छ, “अहिले युवा पुस्ताको आन्दोलनले उठाएका एजेन्डाहरू सम्बोधन गर्दै अन्तरिम सरकार गठन भएको छ र निर्वाचन मिति समेत घोषणा भएको छ। अतः इतिहासका कमजोरीको वस्तुनिष्ठ समीक्षा गर्दै भ्रष्टाचार अन्त्य, सुशासन कायम, रोजगारी सिर्जना र युवालाई मुलुकमै बस्न सक्ने अवसर निर्माण गर्न सके मात्र शहादत प्राप्त गर्नेहरूप्रति साँचो श्रद्धाञ्जली हुनेछ।”
नेपालले अन्तिममा मुलुकलाई शान्ति, स्थिरता र विकासको बाटोमा अघि बढाउन सबै राजनीतिक शक्ति गम्भीर भएर लाग्नुपर्नेमा जोड दिएका छन्।
