काठमाडौं । पोर्चुगललाई हराउँदै फ्रान्स युरो कप-२०२४ को सेमिफाइनलमा प्रवेश गरेको छ । भल्क्सपार्कमा भएको खेलमा पोर्चुगललाई पेनाल्टी सुटआउटमा ५-३ गोलअन्तरले पराजित गर्दै फ्रान्स युरो कपको सेमिफाइनलमा प्रवेश गरेको हो ।
निर्धारित ९० र अतिरिक्त ३० मिनेटको खेल गोलरहित बराबरीमा सकिएपछि खेलको नतिजा पेनाल्टी सुटआउटबाट लिइएको हो । पेनाल्टीमा पोर्चुगलका जोआओ फिलिक्स गोल गर्न चुकेपछि फ्रान्सले सेमिफाइनलको यात्रा तय गर्यो ।
फ्रान्सका लागथि ओस्मान डेम्बेले, फोफाना, जुलेस काउन्डे, ब्राड्ली बार्कोला र थिइयो हर्नान्डेजले गोल गरेका थिए । पोर्चुगलका लागि कप्तान क्रिस्टियानो रोनाल्डो, बर्नार्डो सिल्भा र नुनो मेन्डिसले गोल गरे । तर, फिलिक्स भने गोल गर्न चुके । फिलिक्सको प्रहार पोस्टमा लागेर फर्किएपछि फ्रान्स सेमिफाइनल प्रवेश गर्न सफल भयो ।
फाइनल प्रवेशका लागि अब फ्रान्सले स्पेनको सामना गर्नेछ । स्पेन आयोजक जर्मनीलाई २-१ गोलअन्तरले पराजित गर्दै सेमिफाइनल प्रवेश गरिसकेको छ ।
