एजेन्सी । अर्जेन्टिना कोपा अमेरिका–२०२४ सेमिफाइनलमा प्रवेश गरेको छ । आज बिहान भएको क्वार्टरफाइनल खेलमा इक्वेडरलाई पेनाल्टी सुटआउटमा हराउँदै साबिक विजेता अर्जेन्टिना सेमिफाइनल प्रवेश गरेको हो । अमेरिकाको एनआरजी रङ्गशालामा भएको खेलको निर्धारित समय १–१ गोलको बराबरीमा सकिएपछि खेल पेनाल्टी सुटआउटमा गएको थियो ।
खेलमा अर्जेन्टिनाले अग्रता बनाए पनि त्यसलाई जोगाउन भने सकेन । ३५ औँ मिनेटमा अर्जेन्टिनाका लौटारो मार्टिनेजले गोल गर्दै टिमलाई अग्रतामा राखेका थिए ।
तर, इन्जुरी समयको पहिलो मिनेटमा इक्वेडर खेलमा फर्किएको थियो । इक्वेडरका केबिन रोड्रिगेजले इन्जुरी समयको पहिलो मिनेटमा गोल गर्दै टिमलाई बराबरीमा फर्काएका हुन् ।
पेनाल्टीमा इक्वेडरलाई ४–२ गोलअन्तरले हराउँदै अर्जेन्टिना उपाधि नजिक पुगेको हो ।
पेनाल्टीमा अर्जेन्टिनाबाट प्रहारका लागि आएका पाँचमध्ये चारजनाले गोल गरे। अर्जेन्टिनाबाट पहिलो प्रहारका लागि आएका कप्तान लियोनल मेसीले ‘पेन्नेन्का’को प्रयास गरे पनि बारमा लागेर फर्किएको थियो ।
तर, यसपछि प्रहारका लागि आएका हुलियन आल्भारेज, एलेक्सिस म्याक एलिस्टर, गोन्जालो मोन्सियल र निकोलस ओटामेण्डीले पेनाल्टी प्रहारमा कुनै गल्ती गरेनन् ।
इक्वेडरका एन्जल मिना र एलन मिन्डाको प्रहार अर्जेन्टिनाका गोलकिपर मार्टिनेजले जोगाएका थिए । इक्वेडरको सुरुआती दुई प्रहार बचाएपछि अर्जेन्टिना सहज स्थितिमा पुगेको थियो । इक्वेडरको तेस्रो र चौथो प्रहार गोल भए पनि त्यो जितका लागि पर्याप्त बनेन ।
