काठमाडौं । नेपाली कांग्रेसका महामन्त्री गगनकुमार थापा र विश्वप्रकाश शर्माले पहिलोपटक औपचारिक रूपमा पार्टीको विशेष महाधिवेशन आह्वान गरेका छन्। बुधबार संयुक्त वक्तव्य जारी गर्दै उनीहरूले पार्टी विधानको पालना गर्दै कांग्रेसलाई जीवन्त र सुदृढ बनाउन विशेष केन्द्रीय महाधिवेशनमा सहभागी हुन आह्वान गरेका हुन्। बदलिँदो राजनीतिक परिस्थितिमा पार्टीलाई बलियो बनाउने र जनभावनाअनुरूप नीति निर्माण गर्न विशेष निर्णय लिन अपरिहार्य भएको उनीहरूको भनाइ छ।
वक्तव्यमा उल्लेख भएअनुसार विधानको धारा १७ (२) बमोजिम विशेष महाधिवेशन आह्वान गर्न २४८८ जना, अर्थात् ५४.५८ प्रतिशत महाधिवेशन प्रतिनिधिले हस्ताक्षर गरिसकेका छन्। प्रतिनिधिहरूको उक्त माग विधानसम्मत र बाध्यकारी रहेको उनीहरूको दाबी छ।
महामन्त्रीद्वयले विशेष महाधिवेशनको मागसहित निवेदन पेस भएको तीन महिनाभित्र महाधिवेशन सम्पन्न गर्नु केन्द्रीय कार्यसमितिको जिम्मेवारी भए पनि त्यो सम्भव हुन नसकेको उल्लेख गरेका छन्। ‘विधान बमोजिम निवेदन दिइसकेपछि विशेष महाधिवेशन बोलाउन नसक्ने अवस्थाको परिकल्पना नेपाली कांग्रेसको विधानले गरेको छैन,’ वक्तव्यमा भनिएको छ, ‘विधान बमोजिम कारणसहित माग गरिएको विशेष महाधिवेशनलाई असान्दर्भिक वा औचित्यहीन भन्ने अधिकार कसैलाई छैन।’
उनिहरूले बहुमत महाधिवेशन प्रतिनिधिहरूको विशेष महाधिवेशनको मागप्रति आफ्नो पूर्ण ऐक्यबद्धता रहेको जनाउँदै पौष २७ र २८ का लागि तय गरिएको विशेष महाधिवेशन कानुनी र राजनीतिक रूपमा समेत अपरिहार्य र बाध्यकारी भइसकेको बताएका छन्।
विशेष महाधिवेशन नबोलाउनु विधानको पालना नगर्नु तथा राजनीतिक दलसम्बन्धी कानुनको समेत विपरीत हुने भन्दै नेतृत्वमाथि प्रश्नसमेत उठाइएको छ। ‘“विधान र कानून बमोजिम पूरा गर्नुपर्ने जिम्मेवारी पूरा गर्नु केन्द्रको कर्तव्य हो,’ उनीहरूले भनेका छन्, ‘लोकतान्त्रिक पार्टीका जिम्मेवार पदाधिकारीको रूपमा यो हाम्रो वैधानिक र नैतिक दायित्व हो, हामीले त्यो जिम्मेवारी पूरा गर्नुपर्छ र गर्नेछौँ।’
महामन्त्री थापा र शर्माले पार्टी विधानको धारा ३(१२) तथा धारा २७(१) लाई आत्मसात् गर्दै धारा १७(२) अनुसार मिति २०८२ साल पौष २७ र २८ गते काठमाडौँको भृकुटीमण्डपमा हुन गइरहेको विशेष महाधिवेशनमा सहभागी हुन सबैलाई आह्वान गरेका छन्।
‘विशेष महाधिवेशन ‘बदलिएको समयको कांग्रेसका लागि, बदल्नुपर्ने देशका लागि’ हो,’ उनीहरूले वक्तव्यमा उल्लेख गरेका छन्, ‘पार्टीमा नयाँ ऊर्जा भर्न हामी दृढ संकल्पित छौँ र जस्तोसुकै कठिन परिस्थितिमा पनि पार्टीलाई एकढिक्का राख्न प्रतिबद्ध छौँ।’
